Чапче салаты Корей елінде ең сұрынысқа ие салаттардың бірі. Өте дәмді, тойымды әрі тез дайындалатын асты бізбен бірге дайындап үйреніңіздер.
Салатты дайындау үшін: Күріш лапшасы (Фунчоза лапшасы), 2 тал сәбіз, 300 гр. ет, 1 тал пияз, 2 жұмыртқа, 100 гр. кептірілген саңырауқұлақ (муги босот), 150 гр. шпинат, 2 тал сарымсақ, 2 ас қасық соя соусы, 1 ас қасық күнжіт майы қажет.
Осыларды мұқият дайындап алған соң, алдымен етті ұзыншалап турап, қыздырылған өсімдік майына баяу отта піскенше қуырасыз. Одан кейін жұмыртқалардың ағы мен сарысын бөліп, жеке-жеке қуырасыз. Пиязды турап, сәбізді үккіштен өткізіп, қуырылған еттен қалған майға қуырып алыңыз. Осы аралықта саңырауқұлақтарды жылы суға 5-10 минутқа салып қоясыз. (Корейше аты муги босот, корей дүкендерінен таба аласыз). Шпинатты да қайнаған суға 5 минутқа салып алып, суын сорғытып алыңыз. Сондай-ақ лапшаларды да қайнаған суға 10-15 минутқа демдеп, сосын суын сорғытып тастаңыз.
Енді осылардың барлығын араластырып, ұсақтап туралған сарымсақты, соя соусын және кунжіт майын қосыңыз. Жақсылап араластырыңыз. Табаға салып барлығын араластырып бір қуырып жіберсеңіз де болады. Жеңсік асты жылы күйінде де, салқындатып жесеңіз де өте дәмді.
Асыңыз дәмді болсын!
