| Елімізде он жылдан астам уақыттан бері ұйымдастырылып келе жатқан «Мектепке жол» жалпыреспубликалық қайырымдылық акциясы биылғы жылы тамыздың 1-інен қыркүйектің 30-ына дейін жалғасады. Мемлекет басшысы Қасым-Жомарт Тоқаев биылғы жылды “Балалар жылы” деп жариялап, оларды қорғау үшін денсаулықтарын сақтау, білім беру, әлеуметтік қолдау бағытында нақты шаралар қабылдау керектігін айтқан еді. Президентіміздің өскелең ұрпақтың болашағына мән беріп, жастарға зор сенім артуы қуантады. Міне осыған орай биылғы «Мектепке жол – шекарасыз жақсылық» ұранымен өтіп жатқан акцияның мақсаты — аз қамтылған және көп балалы отбасылардан шыққан оқушыларға, сондай-ақ ата-анасының қамқорлығынсыз қалған балаларға оқу жылының басталуына дайындық кезінде материалдық қолдау көрсету және әлеуметтік себептер бойынша балалардың мектепке қалмай келуіне бағытталған. Аталған шараға аудан басшысы Бақыт Қазанбасов та үлесін қосып, бірнеше балаға спорттық киімдер, сөмке, оқу құралдарын табыс етіп, жақсы оқып, елімізге адал қызмет ететін азамат болып өсуіне тілектестігін білдірді.Сонымен қатар аудан әкімдігіне қарасты бөлім басшылары, мекеме, ұйым, кәсіпорын, шаруа қожалықтарының жетекшілері, жеке кәсіпкерлер де игілікті іске біркісідей атсалысуда. Акция барысында аудан аумағындағы 45 мектепте білім алатын аз қамтылған, көп балалы, тұрмысы төмен отбасының балалары, мүгедек, жетім, ата-анасының қамқорлығынсыз қалған, барлығы 387 балаға көмек көрсетілді. Мәселен, Мырзатай ауылдық округінде орналасқан «Қара-Бура» мал дәрігерлік қызмет көрсету компаниясы» жауапкершілігі шектеулі серіктестігі аз қамтылған және көпбалалы отбасылардан шыққан 5 оқушыға қаржылай 50 000 теңгеден көмегін ұсынды. Жаңатұрмыс ауылдық округінде орналасқан Жібек жолы ауылының кәсіпкері 1 млн. 200 мың теңгеге 60 оқушыны мектеп формасымен, оқу құралдары және спорттық киімдермен, кеңсе тауарларымен қамтыды.Үлгілі ауылының тұрғыны, жеке кәсіпкер 790 мың теңгеге тұрмысы төмен отбасының 10 оқушысына мектеп формасы мен спорттық аяқ киімдерді сыйға тартты. «Аманат» партиясы Байзақ аудандық филиалының атқарушы хатшысы Шолпан Байтақованың ұйытқы болуымен аудандық мәслихаттағы депутаттық фракция мүшелерінің демеушілігімен (932000 теңге) 66 балаға сөмке мен оқу құралдары табысталды. Қазақта “Жақсылық жасасаң — балаға жаса” деген жақсы сөз бар. Себебі бүгінгі мектеп партасында отырған жастар ертеңгі еліміздің тұтқасын ұстайтын азаматтар болып шықпасына кім кепіл. Тәуелсіз еліміздің тірегі — білімді ұрпақ. Сондықтанда мектеп қабырғасында жүрген оқушылардың сабақтан қалмай, сапалы білім, саналы тәрбие алуы үшін барынша жағдай жасағанымыз жөн. Биылғы “Балалар жылында” балалардан ештеңені аямайық. Ал бұған дейін аталған акцияға белсене қатысып, өз көмектерін беріп жатқан азаматтарға алғыстан басқа айтарымыз жоқ.
|
«Ауыл жаңалығы» — ақпарат.
