( Президент Қ.Тоқаевтың «Жаңа Қазақстан: жаңару мен жаңғыру жолы» атты Жолдауынан).
Иә, Мемлекет басшысы, үстіміздегі жылдың 16-наурызында Қазақстан халқына жолдаған «Жаңа Қазақстан: жаңару мен жаңғыру жолы» атты Жолдауында Жаңа Қазақстанды құруға шақырып, қоғамды жаңғырту үшін өзіміз ғана жанашырлықпен, әлбетте, жауапкершілікпен еңбек етіп, ізденуіміз керектігін алға тартқан болатын.
Әрине, осы ретте, елімізді көркейтіп, халықтың әлеуетін арттыруда кәсіпкерлік ісіне, өңірге инвестиция тарту жолдарына арқа сүйеуіміз орынды. Ауданымызда да көптеген азаматтар өз кәсіптерін ашып, өнімдерін шығарып, ауылдарымыздың ахуалын жақсартуға өз үлестерін қосып отыр.
Маусым айында тағы бір жақсы бастаманың куәсі болдық. Меркі ауылдық округінде, қазақстандық «ZETA» өндіруші компаниясына қарасты «Merke Industry» ЖШС-гі өз жұмысын бастады. Бұған дейін ауданымызда өзінің дүкендерін ашқан өндіріс орны енді осы жерде зауытын іске қосып, өнімдерін жергілікті жерде өндіруге кірісіп кетті.
Қазақстандық «ZETA» өндіруші компаниясы – жиһаздар, пластик және металл өнімдерін кеңінен өндіруде тұрақты көшбасшы болып келе жатқан кәсіпорын болып табылады. Ұлттық нарықта 1996 жылдан бері үздіксіз жұмыс істеп келе жатқан бұл компанияның халыққа қолжетімді бірнеше зауыттары жұмыс істеп, ассортиментінің түрлілігімен дараланған жиһаздарын ұсынуда.
«Merke Industry» ЖШС-нің басты бағыты – жұмсақ және корпусты жиһаздар, үйге және кеңселерге креслолар, столдар мен орындықтар шығару болып отыр. Сонымен бірге, зауыт мектептер мен медицина мекемелеріне, сұлулық салондарына, қонақ үйлер мен ресторан бизнесіне, конференц-залдар мен кинотеатрларға да арналған жиһаздарды жасап, ұсынуда. Ең бастысы, олар өнім мен қызметтің сапасына ерекше мән береді.
Осы аптаның сәтті сәрсенбісі күні, Меркі ауылдық округінің аумағында тіркеліп, салық төлемдерін де жергілікті жерде төлеп отырған «ZETA»-ның зауытына аудан әкімі Жорабек Нұрмергенұлы Баубеков ат басын тіреді.
Аудан басшысын және онымен бірге келген аудан әкімдігінің кәсіпкерлік бөлімінің басшысы Ахан Алтынбаев пен Меркі ауылдық округінің әкімі Ғазиз Байарыстанды «Merke Industry» ЖШС-нің директоры Алмаз Олжабайұлы Ақжолов қарсы алып, Жорабек Нұрмергенұлы салтанатты түрде зауыттың лентасын қиды.
– Ауданда, өткен алты айда 17 субъект іске қосылды. Тартылған инвестиция – 1 млрд. 6 млн. теңгеден асып, жаңадан 294 жұмыс орны ашылды. Соның ішінде, Сіздерде ашылған 40 жұмыс орны да бар, ең басты атап өтерлігі, зауытқа жергілікті тұрғындарды тартып жатқандықтарыңыз. Бұл – игі қадам. Енді түнгі ауысымды іске қоссаңыздар, жұмысшылар қатары одан да көбейеді, – деді Жорабек Нұрмергенұлы риза көңілмен.
Директор Алмаз Олжабайұлы қонақтарды зауыт төріне бастап, жұмыстарымен таныстырды. Ең алдымен, қаз-қатар тізілген түрлі өлшем мен түрлі дизайндағы орындықтар назарымызды өзіне еріксіз аударды. Қазағымның «қасықтай екен» дейтін балама сөзіне осы тауарлар сұранып-ақ тұрғандай. Одан әрі, материалдарды қажетті пішінде кесетін құралдарды, содан соң материалдарды қиып, тігіп жатқан жұмысшылармен танысқаннан соң, кең цехтың төріне қарай өттік. Әртүрлі материалдармен (велюр, былғары, драп және т.б.) қапталған дивандар қаз-қатар бой түзеген, дизайндары да әртүрлі екен. Одан соң Алмаз ашылып, созылатын жұмсақ жиһаздар топтамасымен таныстырды, олар тапсырыс берушілерге жіберілгелі тұр екен.
Жиһаздардың қаптамаларын тігіп жатқан қос тігіншіге де еңбек жағдайы жасалған. Қабырғада
материалдардың көрнекілігі жасалып, ілініпті. Тапсырыс беруші қалаған түрін, я, болмаса, түсін таңдай алады.
Зауыт басшылары өндірісті қалдықсыз жүргізуді басшылыққа алған. Жиһаздар мен орындықтардың өлшеміне қарай қиғандағы мата қалдықтарын да іске асыра бастапты. Түрлі ойыншық түрінде, дөңгелек, әрі мамық етіліп тігілген төсеніштер мен сөмкелер, тіптен, балаларға арналған рюкзактар да бар. Келешекте бұл бұйым түрлері арттырылады екен.
Жиһаздарды жинақтау осында, кәсіпорынның үлкен цехында жүргізіледі. Жұмсақ дивандардың – 6, орындықтардың – 22 түрі, кеңселік креслолардың –7 түрі бар, бәрі де – таза қазақстандық өнімдер.
–Тауарлардың ассортименті алдағы уақыттарда кеңейетін болады, – дейді Алмаз Олжабайұлы. – Болашақ жиһаздардың боялмаған каркастары Алматы қаласындағы зауыттардан әкелінеді. Мұнда жұмысшылар оларды арнайы бояу цехында бояп, дайындайды. Ал, тігін цехында тігіншілер дивандар мен орындықтардың қаптамаларын тігеді. Одан соң, орындықтардың отыратын бөліктері мен «арқалары» арнайы аппараттарда нығыздалып, қажетті үлгіге келтіріледі.
…Зауыт іске қосылған алғашқы кездерде мұнда 20 адам ғана еңбек еткен еді, қазір олардың саны 40-қа жетіпті. Түнгі ауысымды іске қосса, жұмыс орындары артады деген сөз. Жұмысшылар таңертеңгі 9.00-ден кешкі 18.00-ге дейін жұмыс істейді. Ал, түнгі ауысымдағылар кешкі 21.00-
ден бастап, таңғы 6.00-ге дейін еңбек етеді. Жаңадан келген жұмысшылар осында, зауыттың өзінде үйреніп, машықтанады. Айлық жалақылары тұрақты, барлық салық және басқа да төлемдері тұрақты төленіп отырады. Ең бастысы, қажетті еңбек жағдайлары жасалынған.
Иә, бүгін біздің әңгімемізге арқау болған «ZETA-Merke» зауытының өнімдері тек Меркінің дүкендеріне ғана шығарылып қоймай, сұраныстарына қарай, Алматы, Шымкент, Түркістан және Тараз қалаларына да дайындалып жіберілуде. Тұтынушыларды жиһаз- дардың дизайны ғана емес, сонымен қатар, сапасы мен бағасы да қызықтырып отырғаны қуантты.
Аудан әкімі Жорабек Нұрмергенұлы, зауыт жұмысымен танысу барысында, кәсіпорын басшыларын бүгінгі аудандағы кәсіпкерліктің бағыт- бағдарымен, инвестиция тарту мен жаңа жұмыс орындарын ашу мәселелерімен жақынырақ таныстырды. Туған топырағына оралып, мынадай үлкен іс атқарып отырған Алмаз Олжабайұлы Ақжоловқа және директордың орынбасары Қанағат Иманбердиевке, техникалық қауіпсіздік жөніндегі басшы Александр Лунгаға, сонымен қатар, бас есепші Қайрат Керімқұловқа, сондай-ақ, ұжым мүшелеріне алғысын жеткізіп, игі қадамдарына сәттілік тіледі.
«Туған жерге туыңды тік!» – деген, міне, осы болар. Кәсіпорын жұмыстарымен кеңінен танысқан біздер де мақсаттары биік, жоспарлары анық, қадамдары нық осынау жас жігіттерге шын жүректен табыс тілеп, риза көңілмен аттандық.
Әтіркүл ИСАЕВА,
«Меркі тынысы».
