Балта және темірмен ұрған: Маңғыстау облысында бір топ адам «есірткі тасымалдаушыларды» аяусыз соққыға жыққан

Видеодан скриншот

Кадрлардан беттерін тұмшалап алған бір топ адамның ер адамды қоршап, қоқан-лоқы көрсеткенін байқауға болады. Кейін оқиға қатысушыларының бірі ер адамға қолын тастың үстіне қоюға бұйырады.

«Қолыңды қой. Ештеңе деп жатқан жоқпын. Болмаса, балтамен шауып тастаймыз. Балта қайда?» – дейді видеодағы ер адам.

Желідегі екінші видеода ер адамның соңынан қуып, балтамен ұрған. Видеоға түсіргендер соққыға жығылған азаматтан кешірім сұрауын талап етеді. Екі видеоның немен аяқталғаны белгісіз.

«Құдай үшін кешіріңдер! Ештеңе таратқаным жоқ, рас айтамын. Дәлелдей аламын. Ұрмашы, өтінемін», – дейді ол.

Видеоға қатысты Stan.kz тілшісіне пікір білдірген полиция департаментінің баспасөз қызметі оқиғаның Маңғыстау облысында болғанын растады.

«Оқиға қатысушыларын полиция анықтады. Күдіктілерді ұстау бойынша шаралар қабылдануда. Қылмыстық кодекстің 293-бабы «Бұзақылық» бойынша сотқа дейінгі тергеу басталды», – делінген хабарламада.

Қазір қылмыстық істі полиция департаментінің басшылығы өз бақылауына алды.