Электродомбыра сүйемелдеуіндегі кең дала үні: Отандық музыканттар ерекше коллаб жасады
Кең даланың дауысына құлақ түріп, ғасырлар бойы жиналған естеліктерді еске түсіріп, жаңа заманның үнімен байланыстыру үшін Jusan бірқатар өнер адамдарымен бірігіп, тыңдарманға жаңа музыкалық туынды ұсынды. Stan.kz тілшісі осы туындыны дайындаған шығармашылық топпен тілдескен еді.
Jusan: Senimmen деп аталатын бейнебаянды режиссер Қуаныш Бейсек түсірген. Оның жетекшілігімен бұл коллабқа Moldanazar, Aldiyar, Darkhan Juzz, Ayau, Dequine және De Lacure қосылған.
«Бұл жобаны жасаған команданың тыңдарманға деген сенімі менің ішкі сезімдеріммен үндесіп тұрды. Біз сол сенімнен шабыт алдық. Әсіресе бүркітпен бір кадрда болған кездер ұнады. Дәл сол кезеңде бірнеше дубль түсірдік, қызықты тәжірибе болды», — дейді әнші Moldanazar.
Ал Ирина Қайратовна тобының мүшесі Aldiyar үшін өнердегі әріптестерімен бір жобада жұмыс істеу қызық болған.
«Маған осы жобада бірге жұмыс істеген адамдар шабыт берді. Өз басым Қуаныш Бейсек қолға алған жобалар сапалы болатынына сенемін. Одан бөлек Ғалымжан Молданазармен бірге жұмыс істегенімен қатты қуандым», — дейді орындаушы.
Жобаға ерекше жаңалықпен келген Dequine тұңғыш рет қазақ тілінде ән шырқаған.
«Өз шығармашылығымда алғаш рет қазақ тілінде ән орындадым. Бәлкім, мені орыс тілді ортада өскендіктен осы тілде ән орындайды деп шақырған болар. Бірақ екі тілді байланыстырып, өз партиямды өзім қалағандай орындап шыққаныма қуаныштымын. Мен бұл шығармаға өзіме шабыт беретін, өзім естігім келетін сөздерді қостым. Ол басқаларға да шабыт береді деп ойлаймын», — дейді әнші.
Шығармаға қазақы үн қосып, қарақыр әуенімен безендірген Darkhan Juzz жобаға қатыспай тұрып, өзінің қандай әуенмен ерекшеленетінін көп ойланғанын айтады.
«Маған қазақтың этникалық музыкасы, яғни ерекше дыбыстарды қолдану техникасы шабыт берді десем болады. Қарақыр әуенімен заманауи музыканы байланыстырғым келді. Бұл жоба сол екі әлемді бір-бірімен біріктіріп, қазіргі қазақ музыкасының түп-төркінін көрсетуге мүмкіндік берді. Көрермендер лайықты бағасын бере жатар», — деді әнші.
Жаңа туындыға бейнебаян түсірген режиссер Қуаныш Бейсекке де осы этникалық музыка қатты ұнаған. Ол этникалық кодты музыкадан бастап бейне түрінде де көрсетуге тырысқан.
«Бұл даму үдерісі жайлы туынды. Мұнда жапондық кейс бар, яғни біз кез келген жаңалыққа ашықпыз, бірақ өзіндік ұлттық ерекшелігімізді де ұмытпаймыз. Оны мақтан тұтамыз. Біздің мәдениет пен тұрмыс-тіршілігіміздің өзі ұлттық мақтаныш бола алады. Біз оны әрдайым есте ұстаймыз, бірақ өзімізді өзге халықтардан жоғары немесе төмен қоймаймыз. Бәрімен теңбіз деген мағына жатыр», — дейді режиссер.
Жоба 2-3 ай көлемінде жасалған. Композитор Дидар Исаханның шығармаларындағы кең дала үні: арғымақтардың тұяқ қағысы, жусанның сыбдыры, күннің батуы мен шығуы, электро домбыра дыбысы Jusan банк өкілдеріне қатты ұнаған. Олар осы ғасырлар бойы жиналған кең дала үнін әрбір қазақстандық естіп, Jusan музыкасымен тарихқа сапар шексе деген ойға келген.
«Музыкалық сапар шабыт сыйлап, рух беруі үшін оған өлең-жыр қосу керек деп ойладық. Жобаны түпкілікті көрерменге ұсыну үшін бейнебаян да қажет болды. Jusan миссиясымен жақсы таныс, біздің брендтің досы талантты режиссер Қуаныш Бейсек көмекке келді. Ол бейнебаянның сұлбасын жасағаннан кейін жобада кімді көргіміз келетінін бірден ұғындық. Осылайша әртүрлі жанрда өнер көрсететін тамаша команданың басын қостық», — дейді Jusan бренд-менеджері Әсем Зәмзам.
Жоба авторлары Jusan: Senimmen туындысының Жаңа жыл алдында қазақстандықтарға шабыт беретініне сенімді. Олар еліміздің өткенін ұмытпай, бүгіні мен болашағына сеніммен қарау керегін әрбір отандасымыздың жүрегіне жеткізуді көздеген.
