Қазақша порнография: Әлеуметтік желіде қазақ тіліндегі эротикалық видео сатқандар көптің жағасын ұстатты

Әлеуметтік желіде қазақ тіліндегі порнография өнімдерін ұсынғандар қызу талқыға түсті. Сонымен қатар пікір блдіріп, қазақша «порно сайт жасауды» ұсынғандар да табылды. Редакциямыз Ішкі істер министрлігіне жүгінген соң әлеуметтік желідегі парақша бұғатталды.

Порнографиялық сипаттағы видеоларды сату үшін мессенджерлердің бірінде арнайы бот жұмыс істейді. Қазақ тіліндегі ұятсыз контенттің құны 2 300 теңге екені көрсетілген. Ал жарнама үшін жартылай жалаңаш қыздардың суретін қолданған.

Желідегі ақпаратқа қатысты пікір білдірген ІІМ өкілі 2022 жылы мониторинг аясында 2 183 құқыққа қайшы сайттың бұғатталғанын мәлімдеді.

«Осының ішінде 10 факті ҚР Қылмыстық кодексінің 311-бабы бойынша, яғни порнографиялық материалдарды заңсыз тарату бойынша тіркелсе, 6 факті кәмелетке толмағандардың порнографиялық бейнелерi бар материалдарды немесе заттарды дайындау және олардың айналымы не оларды порнографиялық сипаттағы ойын-сауық iс-шараларына қатысу үшiн тарту (312-бап) есепке алынды. Мұндай фактілер анықталған жағдайда қылмыстық ауырлығына байланысты ҚР Қылмыстық кодексінің 311-ші және 312-ші бабында көзделген шаралар қолданылады, яғни осы баптар бойынша жаза тағайындалады», – делінген хабарламада.

ІІМ өкілдерінің айтуынша, криминалдық полиция желіде мониторинг жүргізеді. Егер порнографиялық сипаттағы ойын-сауық шаралары анықталса, әрі қарай бұғаттау үшін қажет мәліметтер Ақпарат министрлігіне ұсынылады.

https://stan.kz/kazaksha-pornografiya-aleumettik-zhelide-kazak-tilindeg-375945/