| Байзақ аудан әкімдігі ішкі саясат бөлімі «Жастар ресурстық орталығы» мекемесінің ұйымдастыруымен «Байзақ дарыны» аудандық жастар сыйлығына үміткер жастарды марапаттау рәсімі өтті. Байқау «Мемлекеттік жастар саясаты туралы» Заңын және «Әулиеата жастары» өңірлік бағдарламасын жүзеге асыру аясында іске асырылды. Аудан жастары арасында іріктелген үміткерлерден 55 өтінім қабылданған. Соның ішінде үздік танылған, өңірдегі мемлекеттік жастар саясатын жүзеге асыруда белсенділік танытып, азаматтық ұстанымы қалыптасқан әр түрлі салаларда жетістікке жеткен, оқ бойы озып шыққан дарынды, шығармашыл жастар арнайы номинацияларға ие болды. Салтанатты шара аудан әкімінің орынбасары Дәуір Дәулетовтың құттықтау сөзімен басталды. – Ауданымызда биыл екінші мәрте ұйымдастырылып отырған бұл байқаудың маңызы зор. Себебі аудан жастарының жаңа жетістіктерге ұмтылуға деген ынталарын арттырып, шабыт сыйлайды. Осы байқау жарияланғаннан кейін өздерінің өтінімдерін қалдырып, конкурсқа қатысуға ниет білдірген жастардың барлығына алғысымызды айтамыз. Еліміздің ертеңгі сенімі мен рухын биіктететін де осы жастарымыз алдағы уақытта биіктерден көріне берсін, — дей келе, Дәуір Рысбайұлы «Байзақ дарыны» жастар сыйлығының Ережесіне сәйкес, 10 аталым бойынша топ жарғандарды марапаттады. Олардың қатарында «Үздік жас құқық қорғау саласының қызметкері» Айгерім Атыкай, «Үздік жас спортшы» Асқар Тоқмаханбет, «Үздік жас медицина қызметкері» Сәбира Рысбай, «Үздік жас мемлекеттік қызметші» Есет Өмірәлиев, «Үздік жас кәсіпкер» Нұрбек Орынбасаров, «Үздік жас мұғалім» Аружан Саккулова мен Аида Ділдәқұл, «Үздік жас ауыл шаруашылығы саласының маманы» Дулат Әбілкерім, «Үздік жас әлеуметтік саласының маманы» Олжас Маман, «Үздік жас мәдениет қызметкері» Дулат Жасұзақов атанды. Арнайы аталым иелерімен қатар ауданда мемлекеттік жастар саясатын жүзеге асыруға қосқан үлесі үшін Нұртас Уалиев, Сымбат Жиеналиева және «Балалар жылы» аясында халықаралық байқауларға қатысып, үздік жетекші деп танылған Раушан Балмұхановаларға да аудан әкімінің Алғыс хаты табыс етілді. Жиын соңы концерттік бағдарламаға ұласты.
Арайлым НАРБАТЫРОВА. |
