«Құжат толығымен қате»: Қостанайлық оқушылардың ата-аналары оқу жылының ұзартылуына қарсы шықты
Қостанайда мектеп оқушыларының ата-аналары оқу жылының ұзартылуына қарсы шықты, деп хабарлайды Stan.kz ақпарат агенттігі kstnews.kz басылымына сілтеме жасап.
Облыстық білім басқармасында ұстаздар мен ата-аналар қатысқан жиналыс өтті. Жиналыс барысында ата-аналар “оқу жылын ұзарту балаларға жүктемені азайтады” деген пікірді жоққа шығаратын дәлелдер келтірді.
“Оқу жылын 31 мамырға дейін ұзарту туралы айтылғанда, негізгі аргумент балаларымызға түсетін жүктемені азайту болды. Біз қарапайым есептеулер жүргіздік. Міне, нәтиже: 1-4 сынып оқушыларының жүктемесі 14 сағатқа, бесінші сыныптарда — 10 сағатқа, алтыншы сыныпта — 24-ке, жетінші сыныптарда — 50-ге, сегізінші сыныптарда — 18-ге, тоғызыншы сыныптарда — 72 сағатқа, 10-11 сыныптарда — 30 сағатқа артқан. Яғни, шын мәнінде ешқандай жүктеме жеңілдетілген жоқ. Осыған қарамастан, оқу жылы екі аптаға, яғни 10 жұмыс күніне ұзарды, ал демалыстардан бес күн қысқарды», — деді ата-аналар.
Ата-аналардың оқу жылының ұзартылуына қатысты құжатқа да шағымы бар. Олардың пікірінше, Оқу-ағарту министрілігі оқу жылын «түсініксіз мысалдар» келітірілген қатесі бар құжатқа сүйеніп ұзартып отыр.
«Неліктен мәтінде «әр штат құқылы», «студенттерді оқыту» деген тіркестер қолданылған? Бұл тіркестер қайдан шыққан? Қазақстанда штат деген жоқ қой? Егер құжат мектеп оқушыларына қатысты болса, олар неліктен студенттер туралы айтып отыр? Балаларымыздың өміріне әсер ететін құжатта мұндай қателер толып жатыр. Кейбір сөйлемдерде тыныс белгілері жоқ. Сонымен қатар, логикалық тұрғыдан ақылға сыймайды. Сонымен бірге құжатта пандемияның білім сапасына әсері туралы Нигерия, Мексика, Пәкістан, Кения елдерінің мысалдары келтірілген. Қазақстанның мысалдар қайда? Яғни, құжатта Қазақстан мектептеріндегі оқу мерзімін ұзартудың негіздемесі жоқ. Сонымен бірге құжатта олар алдын ала зерттеу мен сауалнама жүргізгені туралы айтылған. Оқу жылын ұзартқанға дейін Қазақстандағы 6942 мектепте жұмыс жүргізілген-мыс. Бірақ неге екені белгісіз біз бұл туралы білмейміз. Сонда Қостанай мектептерінде өткізілмеген болып тұр ма?”, – дейді ата-аналар.
Қостанай облысы білім басқармасы басшысының міндетін атқарушы Айман Ибраева «Қазақстандық ата-аналар одағы» ҚБ Қостанай өкілдігінің бастамасымен өткен жиында айтылған уәждермен келіскен. Қазақстандағы оқу жылын ұзартуды реттейтін құжат нормаларын қайта қарауды сұрап, Білім министрлігіне хат жолдады.
https://stan.kz/kostanaylik-mektep-okushilarinin-ata-analari-oku-zhilin-376661/
