Бүгін аудан әкімі Бегзат Болатбеков Тайланд астанасы Бангкок қаласында өткен бокстан Азия жастары біріншілігінің күміс жүлдегері Диас Молжігітовты құттықтады. Бокстан Қазақстан Республикасы құрама командасы құрамында ел намысын абыроймен қорғаған жас спортшыға аудан басшысы ізгі тілектерін айтып, ел байрағын желбіретер биік белестерді бағындыру жолына сәттілік тілеп, аудан тарпынан әрдайым қолдау болатынын жеткізді. Бегзат Сейсенқұлұлы болашағынан зор үміт күттіріп жүрген азаматқа бағалы сыйлық пен гүл шоқтарын ұсынып, чемпионмен бірге естелік суретке түсті.
Ал, кездеуге спортшымен бірге келген №17 балалар мен жасөспірімдер спорт мектебінің басшысы Қайрат Жұманқұлов қазіргі таңда Диас бокстағы салмақ дәрежесін өзгертіп, олимпиадалық салмаққа ауысу жұмыстарын бастағанын, ендігі бағыт жазғы олимпиада ойындары екенін айтып, қолдау білдірген аудан басшылығына алғысын білдірді.
Еске сала кетсек, Диас нағыз қордайлық бокс мектебінің түлегі деп айтуға болады. 10 жасынан бокспен шұғылданып жүрген ол осыған дейін де талай белестерді бағындырған. Бокстан Қазақстан Республикасы чемпионатының 3 дүркін чемпионы, 2016 жылы Венгрияда өткен жастар арасында Халықаралық турнирде 2-орын иегері, 2021 жылы Польшаның Кельце қаласында өткен бокстан жастар арсындағы Әлем чемпионатында 75кг салмақ дәрежесінде 3-орынға ие болған.
2022 жылдың желтоқсан айында Повлодар қаласында өткен бокстан ересектер арасындағы Қазақстан Республикасының чемпионатында 75 кг салмақ дәрежесінде жеңімпазы. Қазақстан Республикасының спорт шебері. Енді міне Азия биігін бағындырып отыр.
Ендеше іске сәт!
