Дін – адам тарихындағы үлкен тағылым-тәрбиенің бірі және сарқылмас даналық көзі. Егемен ел болып қалыптасуымыз, мемлекетіміздің өсіп, өркендеуінде діннің алатын орны зор.
Өйткені, дін – имандылықтың, әділдіктің, сыпайылықтың, парасаттылықтың, көпшілдіктің, төзімділіктің кепілі. Діні, тілі жоқ халықтың – болашағы жоқ. Жастардың діни ұстанымы және дінге деген көзқарастарын білу мақсатында, «Сыпатай батыр» мешітінің бас имамы – Әбдіманап Дулат Талғатұлы жастармен кездесіп, «Дін және діл» тақырыбында әңгіме өрбітті. Жиын барысында жастар тәрбиесіндегі басты бағыттар, рухани байлығымыз, атадан балаға мұра болып келе жатқан салт-дәстүрлеріміз және діннің, өзіміздің ислам дініміздің алатын орны туралы мазмұнды айтып берді.
Жаһандану заманында өз дінімізге адалдық таныту, түрлі дәстүрлі емес діндерге бой алдырмау, сол арқылы діни экстремизм мен терроризм атты тажалдарға жол бермеу, ондай пиғылдағы адамдардың жолын кесу – парызымыз екендігіне басымдық беріліп, түрлі мысалдар келтірілді.
Жастар – Тәуелсіз еліміздің ертеңі, үміт күттірген болашағы. Жүрегінде иманы мен Отанына, ұлтына деген сүйіспеншілігі бар жастар мемлекеттің Тәуелсіздігі үшін ең үлкен кепілдік. Жас ұрпақты дұрыс тәрбиелесең, болашағың соншалықты сенімді болмақ. Ал, өзіндік ұстанымы мен пікірі болмаған жастар әркімнің жетегінде кетіп, елдің сорына айналады.
Сондықтан да жастарға айтарымыз – туған еліңіз, аға ұрпақ өкілдері Сіздерге үлкен сенім артады және Қазақ елінің болашағынан үлкен үміт күтеді.
Саян Тілеужан
