Кеше бір өнегелі шараның куәсі болдық. Осымен қатарынан үшінші рет өтіп отырған «Қымызмұрындық» этно-фестиваль бұл жолы «Мәдениет – асыл қазынам» мәдениет күні аясында ұйымдастырылыпты. Тәулігіне екі жүзден аса демалушыны қабылдай алатын, ел игілігіне салынған кешеннің иесі Досан Тасболатұлының халық үшін жасаған мына ересен еңбегіне жұрт риза болды. Жамбыл облысы әкімінің орынбасары, ұлтжанды азамат Қанатбек Мәдібек ұйытқы болып, облыстық ардагерлер кеңесінің төрағасы, ел ағасы Еркінбек Сотыбаев бастап келген аудан, қала, облыс ардагерлерін Жамбыл ауданының әкімі Ерлан Қыдыралыұлы ілтипатпен күтіп алып, қазақы салт-дәстүрлердің көркем үлгілерін көрсетті. Келелі жиынның барысы мәре-сәре әңгімеге ұласып, ән айтылып, домбыра шанағынан күй төгілді. Ұлағатқа толы үрдістерімізді қайта жаңғыртып, осылайша, жастарға үлгі етіп отырғанға не жетсін, шіркін.
Берік Жүсіпов
