Кеше аудан әкімдігінің мәжіліс залында аудан әкімі Бақыт Қазанбасовтың төрағалығымен алдағы Құрбан айт мерекесіне дайындық, ондағы қауіпсіздік шараларына байланысты жиын өтті.
Жиынға аудан әкімінің орынбасары Талғат Жамалов, аудандық ветеринариялық станциясы КМК директоры Мұратбек Төлтаев, аудандық санитариялық-эпидемиологиялық бақылау басқармасы басшысының орынбасары Роза Сайлаубекқызы, ауыл, ауылдық округ әкімдері, аудан әкімдігінің бөлім басшылары, ауданымыздағы ветеринария саласының қызметкерлері қатысты.
-Кейінгі кездері Талас, Жуалы аудандарынан сібір жарасының қоздырғышы анықталып, бірнеше адамның ауруханаға түскенін естіп отырмыз. Міне мұндай ауру ошағы кез келген ауылдан шығуы мүмкін. Ал сол үшін оның алдын алуымыз керек. Бұл ретте төрт түлік малға екпе жұмыстары уақытылы жүргізілуі тиіс. Сондай-ақ алда Құрбан айт мерекесі жақындап келеді. Ауданда құрбандық шалатындарда аз болмайды. Ал олар малды қайдан сатып алады, ол ауру мал емес пе, міне мұның барлығын қарап, қадағалап отыруымыз керек. Базардан сатып алынатын малдардың тиісті құжаттары болуы тиіс,-деді аудан басшысы Бақыт Алпысбайұлы.
Аудандық ветеринариялық станциясы КМК директоры М.Төлтаев аудан малдарының ауруларға қарсы емделіп жатқаны туралы айта келіп, Құрбан айт қарсаңында сырттан сатып алып ауылдарға кіретін малдарға қатаң бақылау жасау керектігін атап өтті.
-Күн қазір ысып тұрса, Құрбан айт күндері 40-41 градусқа дейін көтеріледі деген болжам бар. Сондықтанда біздің айтарымыз мұндай шамадан тыс ыстық кезде ас мәзіріне абай болған жөн. Әсіресе тез бұзылатын сүт өнімдерінен жасалатын тағамдар мен балықтар тез желінуі тиіс. Бұларды келесі күнге қалдыруға болмайды. Сондай-ақ мейрамханалар мен басқа да ас дайындайтын орындардың тағамдарын байқау керек. Осындай қатты ыстық жаз кезінде тамақтан уланудан да сақ болғанымыз жөн. Қазіргі ауаның жоғары температурасы, азық-түлік сақтау ережелерін бұзу және гигиенаны сақтамау асқазан-ішек жолдары ауруларының негізгі себептері болады. Улану көбінесе жарамдылық мерзімі өткен немесе дұрыс сақталмаған, санитариялық нормаларды бұза отырып дайындалған өнімдерден туындайды. Майонез және қаймақ қосылған салаттар, дұрыс жуылмаған жеміс-жидектерде уланудың себептері болуы мүмкін. Міне осылардың алдын алу үшін біз үнемі мейрамхана иесі мен ондағы әкімшілік қызметкерлерін жинап, семинарлар өткізіп жатырмыз. Қолдарына ескерту парақшаларында таратып бердік. Дегенмен халықтың өзі де абай болғандары дұрыс,-деді аудандық санитариялық-эпидемиологиялық бақылау басқармасы басшысының орынбасары Роза Сайлаубекқызы.
Аудан әкімі Б.Қазанбасов ауыл-ауылдардағы құрбан шалатындардың малдарына тиісті мал дәрігері мамандарымен бірлесе қарап шығуы керектігін ауыл, ауылдық округ әкімдеріне қатаң тапсырды. Сондай-ақ мешіт маңайында тазалық сақтау үшін құрбандыққа шалынатын малдарды арнайы мал соятын орындарда сойып, ауылдық округ әкімдері дайындаған аз қамтылған отбасы, жалғызілікті, көпбалалы жандар, тағы басқа да тиісті отбасыларға етін таратып бергендері дұрыс болатынын атап өтті. Құрбан айттың алдындағы жексенбі 25 маусымға келеді. Міне осы күні базардан шығып, ауданға кіретін малдар қатаң бақылауға алынуы керек. Ал бұған аудандық ішкі істер бөлімі қызметкерлерінде жұмылдыру қажеттігі баса айтылды. Жол бойында тұрып, мал сататындарда бұл кезде көбейеді. Ал олардың көбінде малға қатысты тиісті құжаттары бола бермеуі мүмкін. Сондықтанда өте сақ болу жағы қатаң ескертілді.
Жиынға қатысушылар тарапынан қойылған сұрақтарға мамандар тиісінше жауаптар берді.
Сүндетулла ӘБІЛОВ,
Сарыкемер ауылы.
