Кәсіп түбі – береке

Бүгін аудандық ардагерлер кеңесінің ұйымдастыруымен Меркі ауданында «Кәсіп түбі – береке» атты аудан ардагерлеріне арналған тур өткізілді.
Ардагерлер жастарға үлгі боларлық кәсіп түрімен айналысып отырған Муслимов Тимурдың үндік шаруашылығының басына барып көріп қайтты. Мұндағы мақсат ардагер ақсалдарымыз ауылдық елді мекендерде жастарға үгіт-насихат жұмыстарын жүргізіп, кәсіп ашуға бағыт-бағдар беру, жастар арасындағы жұмыссыздықпен күресу болып табылады.
Аудандық ардагерлер кеңесінің төрағасы Байсейіт Жылысбаевтың бастамасымен өткізілген турдың маңызы зор, берері мол.
Тимур Муслимов бес жылдан беру осы кәсіппен айналысып, әбден қыр-сырын меңгеріп алған. Үндік құсы өте нәзік, сондықтан бұл шаруашылықпен айналысу көптің қолынан келе бермейтін көрінеді. Өйткені оларға балаша күтім керек екен.
Тимур өзінің кәсібін «нөлден басталған кәсіп» деп атайды. Өйткені ол жұмыртқалардан үндікті инкубатордың көмегімен шығарып, жеті ай бойы күтіп, баптап, күздің аяғында етін қала дүкендеріне өткереді.
– Бір инкубаторға 110 жұмыртқа сияды. Менде төрт инкубатор бар. Бір салғанда төрт жүзден аса балапан шығарады. Жыл сайын мыңға дейін балапанды күтімдейді. Жеті айдың ішінде таза табысым 10 млн-ға дейін жетеді. Жем –шөбін қамдам, уақытылы суын, дәрумендерін беріп отырса, табысын көптеп көруге болады. Бір үндік 10 келіге дейін салмақ жинайды,-дей келе келген қонақтарға инкубатордан бастап, кезең кезеңімен атқарып жатқан жұмыстарымен таныстырды. Соңында еңбегінің нәтижесі бес жыл ішінде шаңырағын көтеріп, құрылысы аяқталған баспанасын көрсетті.
Қариялар Тимурдың кәсібіне таңдана қарап, ақ баталарын жаудыртты.
Байсейіт Жылысбаев қария Тимур Муслимовке аудан әкімінің Алғыс хатын табыстап, ауданның экономикасына үлесін қосып, өсіп-өркендеуі жолында атсалысып жатқаны үшін ардагерлер атынан алғысын білдірді.Осындай ұрпақ тәрбиелеген анасы Роза Байбосыноваға ізгі-тілектерін айтып, бала үшін жанын беруге даяр аналар қауымына деген құрметтерін білдірді.