Меркіліктер бір мезетте Әнұран шырқады

4 маусым – Қазақстан Республикасы Рәміздер күні мерекесіне орай аудан әкімдігінің алдында мемлекеттік қызметшілер, қоғам белсенділері, ардагерлер мен Жастар ресурстық орталығы мүшелері хормен Қазақстан Республикасының Әнұранын шырқады.
Аудан әкімі барша меркіліктерді айтулы мерекемен құттықтап, Көк туымыздың көкте желбіреу беруін, елімізде амандық болуын тіледі.
Сонымен қатар, мерекелік шараға қатысушылар бір-бірін мерекемен құттықтап, бейбіт, тыныш заманда өмір сүре беруімізді тіледі.
Еліміздің егемендігін айшықтайтын Ту, Елтаңба және Әнұран Қазақстан Республикасының дербестігі мен тәуелсіздігін бүкіл әлемге танытушы әрі мемлекетіміздің өткені мен бүгіні және болашағы арасындағы сабақтастықтың жарқын көрінісі. ҚР рәміздері – халқымыздың мұқалмас рухын, қаһармандығы мен даналығын, асқақ арман-тілегін жеткізетін құнды белгілер. Тәуелсіздігіміздің тұмарына айналған мемлекеттік рәміздеріміз болашаққа бастаған ұлы көшімізді демеп, игі істерімізді қолдай берсін.