Бар жақсылық – балаларға!

Жыл сайын Меркі ауданында 1 маусым – Халықаралық балаларды қорғау күні ерекше, сән-салтанатына сай аталып өтіледі. Бұл жылы да меркіліктер дәстүрден жаңылмай, балдырғандар мерекесіне орай аудан бойынша түрлі іс-шаралар ұйымдастырылды.
Сондай іс-шаралардың бүгін аудандық психологиялық-педагогикалық түзету кабинеті мекемесінде өткізілді.
«Бар мейірім балаларға» тақырыбында өткен іс-шараны мекеме меңгерушісі Гүлнар Утешова ашып, бүлдіршіндер мен ата-аналарды мерекемен құттықтап, қонақтар мен демеушілерге алғыс айтты. Шақырылған қонақтар да ізгі тілектерін білдіріп, балалар еліміздің болашағы екенін, оларға үлкен үміт артатындарын атап өтті. Қонақтар тізімінде Меркі ауылдық ардагерлер кеңесінің төрағасы Тасанбай Дуанабаев, оның орынбасары Насыр Махмутов, «AMANAT» партиясы аудандық филиалының төрағасы Күлайым Шағатаева, аудандық білім бөлімінің әдіскері Зульфия Мелсқызы, әлеуметтік бағдарламалар бөлімінің басшысы Тоғжан Тұрсыналы, аудандық ведомствоаралық психологиялық-медициналық-педагогикалық консультацисы мекемесінің директоры Мира Жұбаева, Меркі ауылдық округі әкімдігінің бас маманы Сайраш Ағадилова, аудандық іскер әйелдер қауымдастығының жетекшісі Айжанат Малдыбайқызы және аудандық «Меркі тынысы» газетінің бас редакторы Қазыбек Камал болды.
Қонақтарға мекемеде тәрбие алып жатқан ерекше білім беру қажеттілігі бар балалар өз таланттарын көрсетіп, ән айтып, күй тартып, билерін тарту етті. Сонымен қатар, балалардың спорттық қабілетін дамыту мақсатында, қазақтың ұлттық ойындарының бірі – «Асық ату» ойыны да көпшілік назарына ұсынылды.
Іс-шара соңында, мекеме меңгерушісі Утешова Гүлнар ұжым қызметкерлеріне ерен еңбектері үшін арнайы Алғыс хаттар табыстады. Мерекеге орай, «AMANAT» партиясы аудандық филиалының төрағасы Күлайым Шағатаева партия атынан балаларға мерекелік сыйлықтар мен тәтті балмұздақтар тарту етті.
Сонымен қатар, асық ату жарысында жеңімпаз және жүлдегер атанған бүлдіршіндер арнайы Грамотамен марапатталды.
Айта кетейік, 1950 жылы 1 маусымда балаларды қорғау күні ретінде алғаш рет мереке ұйымдастырылды. Мейрамды атап өту мәселесі 1949 жылы Парижде өткен әйелдер конгресінде көтерілген еді.