Мемлекет басшысы Қ.Тоқаев Түркістан қаласында өткен екінші құрылтайда көптеген мәселелерге тоқталып, мемлекеттік қызметшілер турасында пайымды пікірлер айтқан болатын. Сонымен қатар, халыққа қызмет көрсету саласында еңбек етіп жүрген жандарға жаңа бағыттар бойынша жол нұсқаған еді. Бұл сөздер біздің бағдарымызды бекемдей түсетіні сөзсіз.
Бүгінгі таңда Шу ауданы әкімдігіне қарасты жергілікті атқарушы органдарда мемлекеттік қызметшілердің жалпы саны 199 адам. Олардың 196-ы нақты жұмыс істестесе, 3 жұмыс орны өз иесін күтуде. Ұлттық құрамына қарай тарқатсақ, әріптестердің 191-і қазақ, 3-і әзірбайжан, 1-і қарашай, 1-і неміс ұлтының өкілдері.
Мемлекеттік қызметшілердің 116-ы ер болса, 80-і нәзік жандылар. 182 қызметкердің білімі жоғары, 14 маманның білімі орта. Аудандағы мемлекеттік қызметшілердің орташа жас мөлшері 39 жас.
Биыл барлығы 11 мемлекеттік әкімшілік лауазымға конкурс жарияланып, лайықты деп танылғандар мемлекеттік қызметке қабылданды.
«Б» корпусының жоғары лауазымдарына жылжытуды төменгі лауазымдағы мемлекеттік қызметкерлер қатарынан іріктеп, «меритократия» қағидаты бойынша 10 мемлекеттік қызметшінің лауазымы жоғарылады.
Жыл басынан 5 мемлекеттік қызметші басқа мемлекеттік органнан тағылымдамадан өтсе, ҚР Президенті жанындағы мемлекеттік басқару академиясының Жамбыл облысы бойынша филиалының қайта даярлау курсын 2, біліктілігін арттыру курсын 28 қызметкер табысты тәмамдады.
Мемлекеттік аппараттың тиімділігін арттырудың бір тәсілі жыл сайынғы бағалау екені белгілі. Осыған сәйкес аудан әкімі аппаратының «Б» корпусы мемлекеттік әкімшілік қызметшілері толық бағалаудан өтіп, нәтижесінде 131 мемлекеттік қызметші тиімді (64,5%), 70 мемлекеттік қызметші қанағаттанарлық (34,5%), 2 мемлекеттік қызметші қанағаттанарлықсыз (1%) баға алды. Бағалау нәтижесі бойынша мемлекеттік әкімшілік қызметшілерге бонус төлеу тәжірибесі енгізіліп, осы жылы мемлекеттік қызметшілер бірінші рет қаржылай бонусқа қол жеткізді. Бонус төлеу жүйесі өз кезегінде мемлекеттік қызметшілердің өзіне жүктелген міндеттерін тиісті деңгейде орындауына ынталандыру болғаны сөзсіз.
Мемлекеттік қызметшілердің жүріс-тұрысы қашанда қоғамның назарынан тыс қалған емес. Сондықтан күн тәртібіндегі мәселеде әріптестеріміздің тәртібі тұруы заңдылық. Бұл ретте біз Әдеп жөніндегі уәкіл ретінде тиісті жұмыстарды жүргізіп отырамыз.
Мәселен, Шу ауданы мемлекеттік органдарының тәртіптік комиссиясының былтырғы атқарылған жұмысы нәтижесінде барлық Шу ауданы мемлекеттік әкімшілік қызметкерлеріне өзге Қазақстан Республикасы заңнама нормаларын бұзу фактісі бойынша 29 (14,6 %) тәртіптік жаза қолданылды.
Әрбір салада оның ішінде мемлекеттік қызмет жүйесінің оң имиджін қалыптастыруда спорттық шаралардың маңызы ерекше. Өңір бойынша мемлекеттік қызметшілердің спорт нысандарына қолжетімділігін қамтамасыз ету кестесі бекітіліп, 37 спорт нысанында спортпен тегін шұғылдануға мүмкіндік жасалып отыр.
Жуырда ғана Шу ауданының мемлекеттік қызметшілері “Тараз-Арена” спорт сарайында өткен Жамбыл облысының мемлекеттік қызметшілері арасындағы спартакиадаға қатысты. Жарыс нәтижесінде жерлестеріміз 1 күміс, 4 қола медаль еншілеп қайтты.
Өткенімізді саралап, таным көкжиегін кеңейту үшін тарихи орындармен танысудың маңызы ерекше. Осы мақсатта кәсіби мереке қарсаңында ауданның мемлекеттік қызметшілеріне Түркістан облысына саяхат ұйымдастырылды. Түрленген Түркістанды тамашалаған әріптестеріміз Арыстан баб және Қожа Ахмет Ясауи кесенесімен танысып, ерекше сәулетті «Керуен-сарай» туристік кешенін аралап көрді.
Осы аптада мемлекеттік қызметшілер, тәртіп сақшылары мен сот саласының қызметкерлері төл мерекелерін атап өтеді. Барлық әріптестерімді кәсіби мерекелерімен құттықтап, игі тілектерімді жолдағым келеді. Үзеңгілестеріме зор денсаулық, отбасыларына амандық, жұмыстарына толағай табыс тілеймін!
Нариман АБАЙ,
Шу ауданы әкімі аппаратының басшысы,
Әдеп жөніндегі уәкіл.
