Әйел қашанда сұлулықтың символы, әдеміліктің айнымас болмысы. Мейлі ол қай салада жүрмесін, тек нәзіктіктің, шексіз махаббаттың, мейірімділіктің үлгісі болып қала береді. Ал сол нәзік арулардың арасында спортты жанына серік еткендері аз емес. Олар тек сұлулығымен ғана емес, спорттағы шеберлігімен де талайды тәнті етіп, әлемді мойындатуда. Міне, бүгін осы мемлекет мақтаныштары жайында сөз етпекпіз.
Әрине, Тәуелсіздік таңының тудырған талантты спортшылары туралы сөз қозғағанымызда ең бірінші есімізге жүзу спорты бойынша Рио паралимпиадасының чемпионы Зульфия Габидуллина түседі. Спорттық жолын 2007 жылы бастаған ол небәрі он жылдың бедерінде мүгедек-спортшылар арасында республикалық, халықаралық және паралимпиалық ойындардың жеңімпазы атанды. Жүзу спортынан әлем рекордына бірнеше мәрте түзету енгізді. Халықаралық дәрежедегі спорт шебері. Бүгінде ұлттық құраманың капитаны.
Зульфияның ең алғашқы жетістігі ел чемпионаттарындағы ІІ және ІІІ дәрежелі жүлделер болды. Сондай-ақ республикалық спартакиаданың медаліне де қол жеткізді. Ал, әлемдік ареналарда ол 2011 жылдары таныла бастады. Ең бірінші Шардж қаласында Бүкілдүниежүзілік ойындарда жеке дара топ жарса, 2012 жылы Англия мемлекетінің Шейфилд қаласында өткен лицензиялық турнирдің чемпионы атанды. Артынша 2013 жылы Канада жеріндегі Әлем чемпионатында қола және күміс жүлдені қатар жеңіп алды. Сондай-ақ осы байрақты бәсекеде әлем рекордын жаңартты. Бұдан бөлек, Голландия елінде өткен Бүкілдүниежүзілік ойындардың төрт дүркін чемпионы атанып, әлем рекордына үш мәрте түзету енгізді. Міне, осындай ерлігімен төрткүл әлемді таңғалдырған спортшы Польша қаласында өткен халықаралық турнирдің биігін тағы бағындырды. Сонымен қатар Оңтүстік Корея елінде түндігі түрілген Азиялық паралимпиалық ойындарында қарсыластарын шаң қаптырып, алтын медальді кеудесінде жарқыратты. Ал Зульфияның спорттық жолындағы ең биік шыңы – ол әрине Рио паралимпиадасы. Бұл сында жерлесіміз 100 метр қашықтыққа еркін жүзуден Қазақстанның паралимпиада ойындарының алғашқы алтынын иеленіп қана қоймай, әлемнің жаңа рекордын орнатты. Осылайша елуінде ел мерейін асқақтатқан «алтын қызымыз» Әнұранымызды Рио де Жанейро төрінде шырқатты.
Рио паралимпиадасынан кейін Зульфия Мексика төрінде жалауы желбіреген әлем чемпионатында да жасындай жарқылдап, Қазақстан спорты тарихында болмаған алтын медальді жеңіп алды. Осынау еңбегін ескерген Елбасы Габидуллинаны ІІ дәрежелі «Барыс» орденімен марапаттады. Бүгінде әртүрлі деңгейдегі 160 медальға ие жерлесіміздің ендігі арманы Токио төрінде де көк байрағымызды желбірету.
Әлемдік ареналарда байрағымызды биіктетіп жүрген тағы бір әулиеаталық аруымыз – 
Гузалия Гафурова. Ол каратэ-до спортына 2004 жылы келіп, араға үш жыл салып алғашқы нәтижесін көрсетті. Сол жылы ел біріншілігін жеңіп алған Гузалия артынша ересектер арасында ел чемпионы атанды. Кейіннен бұл жетістігін тағы бір мәрте қайталап, екі дүркін чемпиондық атақты еншіледі. Ал ең үлкен жеңісі – 2013 жылғы Азия кубогы мен Әлем чемпионатының алтын медалі. Небәрі он жылдың ішінде осындай табыстарға қол жеткізген аруымыз 2016 жылы Азия ойындарының да биігін бағындырды. Алдыңғы жылдары Гузалия шаңырақ көтеріп, ана бақытына кенеліп, спорттан қол үзіп қалған еді. Алайда араға екі жыл салып, үлкен спортқа қайта оралған ол былтыр Индонезия жерінде алауы тұтанған Азия ойындарында алтыннан алқа тағып, талайды таңғалдырды. Гафурова өткен жылдың қорытындысы бойынша «Жыл спортшысы» атанды. Екі жылдық үзілістен кейін үлкен спортқа қайта оралып, жеңіс тұғырынан көріну әрине, сөзсіз ерлік.
Жамбыл бокс мектебінің түлегі Фируза Шарипованың да есімі мен ерлігі бүгінде жер-жаһанға жайылды. Боксшы қызымыз IBO және WBC Silver белбеулерінің иегері. Жастайынан велоспортпен айналысқан ол 2010 жылы боксқа бет бұрып, шаршы алаңның шырайын кіргізді. Ә дегеннен жасындай жарқылдаған Фируза 2012 жылы Азия чемпионатының қола жүлдесін жеңіп алса, 2013 жылы республика жеңімпазы атанды. Ал 2016 жылы кәсіпқой боксқа ауысып, араға аз уақыт салып халықаралық «ЭКСПО-2017» көрмесі аясында өткен бокс кешінде болгар боксшысы Милена Колеваны ұрып жығып, әлем чемпионы атанды. Артынша бельгиялық Джемилла Гонторюкпен қолғап түйістірген Фируза екінші жартылай салмақта теңдессіз екенін дәлелдеді. Осылайша, екі бірдей белбеуге қол жеткізген жерлесімізді атақты Майк Тайсонның бапкері Бадди Мак Гирттің өзі жаттықтыруға ұсыныс тастады. Сондай-ақ Фирузаға Голливуд қызығушылық танытып, «Игра престолов» телехикаясына түсуге ұсыныс білдірген. Алайда жерлесіміз киноиндустриядан гөрі, үлкен спортты таңдап отыр.
Ұзынқұлаққа сенсек, қазір Шариповаға аспан асты елінің спорт мамандары «құда» түсіп, Токио Олимпиадасында Қытай мемлекеті туының астында өнер көрсетуге ұсыныс білдіріп жатқан көрінеді. Алайда «алтын қызымыз» кәсіпқой бокстан кетпейтінін, төртжылдықтың айтулы аламанында бокстасса да, егеменді еліміздің намысын қорғайтынын айтуда.
Ел спортында «су перілері» деген лақап атқа ие болған «Айша бибі» су добы клубының да жеткен
жетістіктері аз емес. Жалпы жамбылдық клубтың ойыншылары қазір ұлттық құраманың 100 пайызын құрап отыр. Инчхонда өткен Азия ойындарында басқа емес, толық «Айша бибі» клубының спортшыларыны өнер көрсетті. Олар артылған үмітті ақтап, Корей жерінде әлемнің ең үздік үштігінен көрінді. Сондай-ақ алдыңғы жылы Токиода түндігі түрілген Азия ойындарында да қола жүлдеге қол жеткізді. Ал былтыр Джакартадағы сары құрлық бәсекесінде «Айша бибі» су добы клубының арулары күміс медальмен қуантты. Осының өзі аталмыш клубтың беделін асқақтатып тұрғаны анық. Сондықтан әулиеталық бұл арулардың келешегінен үлкен үміт күтсек болады.
Жүзу спортының жарық жұлдызы атанған Эльмира Айгалиеваның да ерліктері ел есінде. Жастайынан спортқа жаны құмар болып өскен жерлесіміз жасөспірім кезінде-ақ ұлттық құрама сапына алынып, Азия біріншілігінің жүлдегері атанды. Ал ересектер арасында Айгалиева 2009 жылдары көріне бастап, жабық кешендегі Азия ойындарында үш қашықтықта алтын, күміс және қола медальді қатар жеңіп алды. Осы жылы Токиода өткен Азия біріншілігінде күміспен күптеліп, 2011 жылы Джакартада ұйымдастырылған сары құрлық бәсекесінде алтыннан алқа тақты. Бұдан бөлек, Айгалиева 2013 жылы Инчхонда алауы тұтанған Азия ойындарында әлем рекордын орнатып, 2014 жылы Түркияда жалауы желбіреген ашық Азия біріншілігінде топ жарды. Алайда бұдан кейін екі жыл спорттан қол үзген Эльмира 2016 жылы қайта оралып, Қазақстан кубогында алты алтын медальді кеудесінде жарқыратты. Бірақ, бұл нәтиже қызымызға құрлықтық бәсекелерге жол ашпады. Сол себепті, бүгінде Эльмира Алматы қаласында жаттықтырушылық қызметпен айналысуда.
Бұдан бөлек, 2017 жылы Сочиде самбо күресінен өткен әлем чемпионатында тағы бір талантты жасымыз Аида Карчаева қола жүлдемен жамбылдықтардың мерейін үстем етті. Әлемнің 100-ден аса мемлекетінің спортшылары бақ сынаған бәсекеде қаршадай қызымыз 56 келіде қарсыластарын алып та, шалып та жығып, үздік үштіктен көрінді. Үлкен спортқа енді ғана қадам басып келе жатқан Аиданың жасөспірімдер арасындағы ел чемпионы, Универсиада жеңімпазы, Еуропа кубогының жүлдегері сынды жетістіктері бар. Сондай-ақ ол дзюдо және самбо спортынан ұлттық құраманың мүшесі. Аиданың да алар асуы алда екеніне бек сенімдіміз.
Әулиеата топырағы тудырған тағы бір талантты аруымыз – Екатерина Тарасенко. 2009 жылдан армрестлинг спортымен айналыса бастаған Екатерина араға жыл салып ел біріншілігін жеңіп алды. Осы жылы Азия чемпионатының да биігін бағындырған жерлесіміз 2014-2015 жылдары әлемнің теңдесіз спортшысына баланды. Аз уақытта осындай толайым табысқа қол жеткізген ол бүгінде армрестлинг спорты бойынша халықаралық дәрежедегі спорт шебері. Даңқты армрестлингші Дмитрий Трубиннің шәкірті. Сондай-ақ бұл спорт түрінен жасындай жарқылдап жүрген Татьяна Веринаның да еңбегін елеусіз қалдыруға болмас. Татьянаның еншісінде қазір Азия мен үш дүркін Әлем чемпионы деген атақ бар.
Ал, жамбылдық Ақтолқын Смағанбетова соңғы жылдары самбо күресінен қарсылас шақ келтірмеуде. 2014 жылы ол ел біріншілігінің қола жүлдесін жеңіп алса, осы жылы Азия чемпионатының алтын медалін иеленді. Сондай-ақ Ақтолқынның спорттық жолында 2015 жыл жемісті болғанын айта кеткен жөн. Бұл жылы самбошымыз ел біріншіліктерімен қатар, ҚР Тұңғыш Президентінің жүлдесіне арналған Әлем Кубогында қола жүлдеге қол жеткізді. Сонымен қатар Әлем чемпионы атанды.
Тағы бір талантты аруымыз Арайлым Шегенованың да самбо күресінен жеткен жетістігі жетерлік. Қаракөзіміз 2014 жылы өз салмағында Қазақстан мен Азия чемпионатының жоғары сұрыпты жүлдесін мойнына тақса, 2015 жылы осы ерлігін қайталап, әлемдік аренада көк байрағымызды биіктетті.
Өңірде жеңіл атлетика спорты да күн санап қарқын алуда. Оған дәлел, Қордай ауданының тумасы Светлана Иванчукова бүкіләлемдік және Азия чемпионаттарымен қатар, Рио Олимпиадасына да қатысып, жүйріктермен үзеңгілесіп өнер көрсетті. Әлемнің нөмірі бірінші спортшылары бақ сынайтын бәсекеде шеберлігіңді дәлелдеу оңай шаруа емес. Сондықтан талабы таудай Светлананың жұлдызды шағы әлі алда екені даусыз.
Міне, әлемдік додаларда атой салып жүрген әулиеталық аруларымыздың дені осы. Бұдан бөлек, Ресей чемпионатында шыңдалған, биылдан бастап қазақ елінің атынан жарыс жолына шығып жүрген жамбылдық шахматшы Бибісара Асаубаева сынды жас талант иелері де бар. Бұл есімдер ел спорты тарихында мәңгі сақталары даусыз.
Саятхан Сатылғанов
