Бүгінде ауыл тұрғындарының ауласында тиесілі жерлер бар. Құрамы дәруменге толы бау-бақша өнімдерін өсіріп, баптап, өзгеге үлгі көрсетіп жүрген ауыл азаматтары жетерлік.
Бүгінде еңбек етемін, кәсіп жасаймын деген адамға мемлекет тарапынан қолдаулар көрсетілуде. Елімізде азық-түлік қауіпсіздігімен қамтамасыз ету мақсаты мен шарықтаған бағаны ұстап тұрудың бірден-бір көзі-өнім өндіру. Ауданымызда оның ішінде ауылдық округтерде игілікті істер атқарылуда. Бау-бақшасында тынбай еңбек етіп, бала-шағасының несібесін тауып отырған Ә.Бүркітбаев ауылының тұрғыны Асқар Елеубайұлы Байтілеуовтың ісі өзгеге үлгі-өнеге.
Жерін баптай білген диқан берекелі алтын күзде астық пен жемісін қаптай біледі. Ауыл тұрғыны Асқар Елеубайұлы да қыстық азығын жинауға қамданып жатыр. Бақша егуге бала-шағасымен жұмыла кіріскен ол ерте көктемнен еңкейіп еңбек етті.
Нәтижесі, міне, еккен өнім пісті, ауызға түсті. Қолы бос уақытында бауды күтіп баптайды екен. Өйткені балаларының несібесі. Күзде пісіп ауызға түсетін өнімнің неше атасы бар. Қияр, қызанақ, картоп тағы басқа жемістер бұл бақшадан табылады.
-Бала-шағамызбен бақша дақылдарын егумен айналысып, өзімізге қажетті өнімді аламыз. Бақшаның ұсақ-түйек жұмысы көп, оған ерінбейтін адам керек. Ал еңбек денсаулыққа пайдалы. Арам шөбін жұлып, шаруасын жайғасаң бұл әрі бала –шағаңа көмек, әрі өз денсаулығыңа пайдалы. Қазақта «Еңбек етсең ерінбей, тояды қарның тіленбей»,-деген сөз бар. Жаз бойы ерінбей еңбек етсең, жыл бойы рахатын көресің,-деп, жастарды еңбек етуге, ауданның дамуына өзіндік үлестерін қосуға шақырды.
Жаңатас қаласы көркейіп, ажарланып келеді
Кеншілер шаһары күннен –күнге даму үстінде. Жарты ғасырдан астам тарихы бар қаламыз тотыдай түрленіп, құлпыра түскен.
Жаңарған саябақтар мен скверлер, абаттанған аулалар мен көшелер, әрленген әлеуметтік нысандар мен ескерткіштер қала көркіне көрік қосуда. Жыл өткен сайын заман талабына сай инфрақұрылым қалыптасып келеді. Қаламыздың гүлдене түсуі жергілікті бюджеттен бөлінген қаражатының дер кезінде тиесілі салаларға бөлініп, діттеген жеріне жетіп отырғанның айқын көрінісі болса керек. Осының бір дәлелі ретінде қала әкімі аппаратының тарапынан қала көшелеріне сәнді үлгіде орындықтар орнатылуда.
Бүгінгі қаламызда осыдан 10 жылғы келбетімен салыстырғанда көптеген игі өзгерістердің орын алғанын байқаймыз. Орталықтағы әсем ою-өрнектер, түрлі гүлдер, жарық шамдары, сәнді үлгідегі жасалған орындықтар шаһарымызға ерекше сән беріп тұрған дүниелерді көзіміздің қарашығындай сақтап, аялау барлығымыздың басты міндетіміз.
Сәулет Есқараев, «Sarysý»
