Жамбыл облысына жұмыс сапарымен келген Қытай Халық Республикасының Хух-Хото қаласы мэрінің орынбасары Ван Синьой бастаған делегациялық топ «Анаға тағзым» отбасын қолдау орталығында қонақта болды.
«Береке» аспаздық студиясының курс қатысушылары әзірлеген «Ыстық табақ» асынан дәм татқан қытайлық қонақтар аспаздарға ризашылық білдірді. «Бойтұмар» тігін және дизайн студиясында қонақтар қазақ халқының қолөнер бұйымдарының жасалу барысын көрді.
Мұнан соң, меймандар «Мирас» ата-дәстүр залында қазақ халқының «Бесікке салу» рәсіміне куә болды. Оларға «тыштырма» үлестіріліп, бастарына қазақтың ұлттық бас киімі тақия кигізіліп, «Ана тілі» шешендік өнер үйірмесінің ертегілер жинағы тарту етілді.
Кездесу соңында Ван Синьой: «Бұл орталықтың жұмысы менің көңілімнен шықты, сіздермен тәжірибе алмасу барысында Қытайда да осындай орталықтар ашу керек екен», — деп ойымен бөлісті.
Дедек Төлен
