Бүгін Тараз қаласының әкімі Бақытжан Орынбеков шаһардағы бірқатар нысанды аралады. Әуелі қала әкімі Д.Қонаев көшесіндегі №6 көпқабатты тұрғын үйдің ауласын абаттандыру жұмыстарын көрді.
– Биыл қала бойынша 26 аула абаттандырылуда. Ойын алаңшаларын орнатқанда ең әуелі тұрғындардың сұранысы мен балалар қауіпсіздігіне баса мән беруіміз керек. Сондай-ақ құрылыстың да сапасы басты назарда. Бұл жұмыстар алдағы уақытта да жалғасады, – деді Бақытжан Әмірбекұлы.
🔹Бұдан кейін шаһар басшысы Братская және Саңырақ батыр көшелеріндегі жаяу жүргіншілер (тротуар) жолына аялдады. Бүгінде мұндағы құрылыс жұмыстары қарқынды жүргізілуде.
🔹Келесі кезекте қала әкімі «Ұлы дала» (15) ықшамауданына ат басын бұрды. Қазір аталған мөлтек ауданның 1, 2, 3, 4 көшелеріне жол төселуде. Алайда, шаһар басшысы мұндағы жол құрылысына көңілі толмайтынын жасырмады.
– Қазір мұнда құрылыс қайнап жатуы керек еді. Алайда құрылыс басында бірде-бір техника байқалмайды. Егер алдағы уақытта да бұлай жалғаса берсе, мұндай мердігер компаниямен келісім-шартты бұзуға тура келеді, – деген қала әкімі жауаптыларға тиісті шара қолдану қажеттігін ескертті.
