Елбасы Н.Ә.Назарбаев өзінің «Болашаққа бағдар: рухани жаңғыру» атты бағдарламалық мақаласында «Қазақ «Туған жерге туыңды тік» деп бекер айтпаған. Патриотизм кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады», дей келе қазақстандықтарға ой салатын «Туған жер» бағдарламасын ұсынғанын білеміз. Осы бастама атымтай жомарт жандардың өз туған жеріне деген ыстық ықыласы мен сүйіспеншілігін қайта оятқандай болды. Бұған дейін де өзінің қолы ашықтығымен, жақсылық жасауға жаны құмарлығымен елдің назарына іліккен қордайлық белгілі кәсіпкер, «ССС» сауда кешенінің иесі Сәрсебек Салыбаев биыл да жерлестеріне үлкен қуаныш сыйлады. Нақты айтсақ, Қордай ауданының Құрметті азаматы С.Салыбаев көмекке зәру, тұрмыс жағдайы төмен 3 отбасыға арнап үш пәтерлі үй салып берді.
Ұзақ жылғы құқыққорғау саласындағы қызметінен кейін, зейнетке шығып кәсіптің көзін таба білген, жомарттығымен танылған Сәрсебек Сұлтанәліұлының игі істерін жергілікті жұрт жақсы біледі. Қайырымдылық жасауда алдына жан салмайтын кәсіпкер осыған дейін де бірнеше отбасыға баспана салып, қуаныш сыйлап келген. Енді міне, ол мұнымен шектеліп қалмай жуырда Алғыс айту күніне орай 3 отбасыға су жаңа үйдің кілтін салтанатты түрде табыс етті. Бұл қуанышқа ортақтасып, құтты болсын айта барған жандардың арасынан аудан әкімі Болатбек Байтөле бастаған басшылық өкілдері де көрінді. Шашуын шашып, көрімдігін ала келген жұрт ақжарма тілегін төгіп, жаңа үйде тек жақсылық болсын деп ағынан жарылды.
– Сәрсебек Сұлтанәліұлы аудан ғана емес, облыс көлемінде қайрымыдылық шаралардың алдыңғы қатарынан көрініп жүрген азаматтардың бірі. 2017 жылдан бастап ауданның барша азаматтарына үлгі боларлықтай ізгі іс жасап, 2017 жылы 5 отбасының баспаналы болуына өз септігін тигізсе, міне бүгін тағы 3 отбасыға баспа бақытын сыйлап отыр. Сізге осындай игі бастамаңыз үшін алғыс білдіреміз, отбасыңызға амандық, деніңізге саулық, жұмысыңызға табыс тілейміз. Ал, қоныс той иелері, жаңа баспаналарыңыз құтты болсын! Үйлеріңіз тек қана жақсылыққа толы болсын, – деді аудан әкімі өз құттықтауында.
Жаңа қонысқа кірген жалғызбасты ананың бірі Гүлмира Добай «ССС» сауда кешінінде даяшы болып жұмыс істейді. Оның көптен бергі аңсаған бір арманы – баспаналы болу еді. Сәрсебек ағасының арқасында ол Алғыс айту күнінде арманына жетіп, қайырымды азаматқа шексіз ризашылығын білдірді.
Осындай қуанышты сәтті басынан өткізген жалғыз басты ананың бірі Раяна Бектұрова аудандық аурухананың перзентхана бөлімінде медбике болып қызмет етеді. Екі қыз тәрбиелеп болашағынан үмітін үзбеген бұл ананың да қуанышында шек жоқ.
«ССС» сауда кешенінде қызмет ететін Әуелбек Балбектің де баспана кілтіне қолы жетті. Әкесінен ерте айырылған Әуелбек тапсырмаға тиянақтылығымен, жұмысқа деген адалдығымен, табандылығымен өзгелерге үлгі болып жүрген жан екен. Осы қасиетін байқап, бағалай білген Сәрсебек Салыбаев жас жігіттің болашағына алаңдап, қамқорлығын аямады.
Баспаналы болғандар өз қуанышына ортақтасып келген азаматтарға және Сәрсебек Сұлтанәліұлына үлкен алғысын айтса, кәсіпкер қайырлы іс жасауда аянбау керектігін айтып, өзге де қалталы азаматтарды осындай ортақ мақсатқа шақырды.
Жасұлан БАҚЫТБЕКҰЛЫ
Қордай ауданы
