Бүгінгі күні көпбалалы аналардың әр аймақ, Үкімет, Елбасына дейін көтеріп жатқан әлеуметтік мәселелері тек осы жылы туындаған түйткіл емес. Себебі осыған дейін басына баспана таппай, тұрмыстың тауқыметін тартып, әкім қаралардан көмек сұрап барған жас отбасылардың қарасы қалың болды. Бұдан 2-3 жыл бұрын ғана бір Астананың өзінде әр өңірден жиылған өрімдей жастар құрылыс саласында жүрді. Жастық жалынмен олар әуелі тұрғын үй жайын ойлаған жоқ. Алайда уақыт өте өмірге сәбилері келіп, жанұя басы көбейгенде, мәселесі шаш етектен толы жас көпбалалы ана мен әке атанды. Жастар үлкен қиындықтарды сонда сезінді. Осындай ауыртпалықты көтере алмаған көп отбасы ажырасып та кетті. Ресми мәліметке сүйенсек, бүгінде елімізде 500 мыңға жуық бала әкесіз өсіп келеді екен. Бұқар жырау бабамыз: «Әкелі бала – жаужүрек, әкесіз бала — сужүрек» деген. Оған қоса «әке көрген – оқ жонар, шеше көрген – тон пішер» деген де халық даналығыт бар. Сондықтан Үкімет жас отбасылардың мәселесін басынан ойлап, әкесіз өскен жетімдердің санын азайту бағытында жұмыс жасауы қажет.Әрине, ештен кеш жақсы. Облыс әкімі Асқар Мырзахметовтің жақында ел алдында берген есебінде ақылға қонымды аталы іс бастайтынын айтты. Аймақ басшысы көпбалалы отбасылармен мұқтаж жандарға биыл 10 жатақхана салынатынын және коммуналдық төлемдері жеңілдетілетінін мәлімдеп, көмескіленген үміттерге қайта сәуле септі. Бұл өзге өңірлерге де үлгі болар өрелі іс деп білемін. Сондай-ақ үстіміздегі жыл Жастар жылы болғандықтан, жас отбасылар да осындай шарапаттардан шет қалмай, барынша қолдауға ие болса, бұл ұрпақ келешегі үшін жасалған игі қадам болары сөзсіз.
Ел ертеңі жастар екенін ұмытпайық, ағайын!
Жапар Сатылғанов
