Бүгінде қай салада болмасын білікті кадрлар жетіспейді. Ал, жастардың басым бөлігі гуманитарлық мамандықтарға әуес. Осылайша, техникалық мамандықтар тасада қалып, инженерлер мен өнеркәсіп өкілдері саусақпен санарлықтай хәлге жетті. Ел Президенті Қасым-Жомарт Тоқаев өткен жылы Парламент Мәжілісінің отырысында бұл мәселе жөнінде өз ой-пікірін айтып, жауаптыларға білім саласын дамытуға жол ашатын бірқатар тапсырмалар берді. Мемлекет басшысының өзі білікті маман тапшылығына айрықша көңіл бөлсе, бұл проблеманың қаншалықты өзекті екенін өзіңіз-ақ бағамдай беріңіз.
Қазіргі таңда «Жол активтері ұлттық сапа орталығы» өңірлік филиалында да кадрлық дефицит байқалады. Нақтылай түссек, осы салаға аса қажетті мамандар: машинистер, механиктер, бетоншылар, автогрейдеристер, асфальтбетоншылар мен зертханашылар жетіспейді. Өңірлік филиалдың жетекші сарапшысы Жұмахан Шәкірбаевтың сөзінше, жамбылдық жолшылар жүйелі жүргізген үгіт-насихат жұмыстарының нәтижесінде бірқатар мектеп оқушылары жолшы мамандығын таңдауға ниет білдірген.
— — Мәселен, тараздық Әзиз Мұратов, Николай Павлов, Юсуф Чауш-Оглы және Роман Ковалев сынды бірқатар мектеп оқушылары жолшы болуға дайын екендіктерін мәлімдеді. Біз олармен кездескенде жол сапасының бақылау жұмыстары қалай жүргізілетіні, зертхана жұмысы мен жылжымалы зертхана кешені туралы әңгімелеп бердік. Сондай-ақ, бұл күндері болашақ мамандық иелерінің назарына автокзизөлік жолдарын салу мен олардың сапасын бақылау жұмыстары жөніндегі арнайы бейнесюжет ұсынылды. Өз кезегінде оқушылардың бұл салаға қызығушылығы оянып, ынтасы бар балалар асфальт жабындысы қалай төселетініне дейін білуге құмарта түсті, — дейді өңірлік филиалдың жетекші сарапшысы Жұмахан Шәкірбаев.
