Ата Заң – азаматтардың құқығы мен бостандығын, мемлекетіміздің егемендігі мен бүтіндігін сақтайтын, елдің бағыт-бағдарын айқындайтын басты құжат.
1995 жылы тамыздың 30-ында Қазақстан халқы өз жолын таңдап, тарихи шешім қабылдап, еліміздің Конституциясы бекітілді.
Осы уақыт ішінде Қазақстанның Ата Заңы өзінің заман талабына лайықты екенін көрсетті.
Бүгін осынау мерейлі мерекеге байланысты аудандық мәдениет үйінде салтанатты жиын өтті. Салтанатты шара Мемлекеттік Ту енгізіліп, Мемлекеттік Әнұранмен басталды.
Салтанатты шараға аудан әкімі Сәкен Мамытов қатысып, сөз сөйледі.
«Азаматтығымыздың айшықты айғағы болған Ата Заң – Тәуелсіздіктің теңдессіз тартуы. Біз қуатты елге, әлеуетті ұлтқа айналдық. Өткен жылы Мемлекет Басшысының бастамасымен елімізді одан әрі демократияландыра түсу мақсатында жалпыхалықтық референдум өткізіліп, Ата Заңымыздың 33 бабына 56 өзгерту енгізілді. Ел үшін маңызды күнде сарысулықтар да бірлік танытып, орнықты қадам жасады. Конституция талаптарын сақтап, Мемлекет басшысы белгілеп берген міндеттерді жүзеге асыруда аудан жұртшылығы да еселі еңбектің үлгісін көрсетіп келеді. Ата Заңын ардақ тұтқан еліміздің еңсесі биік, рухы асқақ, болашағы жарқын, береке-бірлігі мәңгілік болсын», — деген аудан басшысы жиынға қатысушыларды мерекемен құттықтады.
Бұдан кейін аудандық мәслихат төрағасы Шаттық Мұсабеков сөз сөйлеп, жиналғандарға мерекелік құттықтауын жеткізді.
Ауданның әлеуметтік- экономикалық дамуына өзіндік үлесін қосып, үздік жетістіктерге жетіп жүрген бір топ аудан азаматтары, сондай-ақ заң үстемдігін сақтау, азаматтардың құқықтары мен бостандықтарын қорғау, құқықтық тәртіп пен қоғамдық қауіпсіздікті қамтамасыз етуде жемісті еңбек етіп жүрген құқық қорғау саласының қызметкерлері Жамбыл облысы әкімінің Құрмет грамотасымен, «Сарысу ауданына сіңірген еңбегі» үшін медалімен, аудан әкімінің, аудандық мәслихаттың Құрмет грамоталары және Алғыс хаттарымен марапатталды.
Салтанатты жиын мерекелік концерттік бағдарламамен жалғасты.
