Аптаның сейсенбісінде «Nur Otan» партиясы аудандық филиалының мәжіліс залында халыққа атаулы әлеуметтік көмек көрсету бойынша жиын өтті. Оған Шу және Мойынқұм аудандарының жұмыспен қамту және әлеуметтік бағдарламалар бөлімінің басшылары, халықты жұмыспен қамту орталықтарының директорлары, аталған салада қызмет істейтін Шу қаласы және ауылдық округтердің жауапты мамандары қатысты. Аталған жиынға Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасының бөлім басшысы Марал Ділдабекова арнайы шақырылды.
Айта кету керек, Жамбыл облысының барлық өңірлерінде 13-21 қазан аралығында өтетін аталған семинар Тұңғыш Президент Н.Назарбаевтың 2015 жылғы «Nur Otan» партиясының кезекті съезінде қабылданған «100 нақты қадам» Ұлт жоспарының 84 қадамын жүзеге асыру негізінде өткізілуде. Бұл маңызды құжатта халықтың әлжуаз топтарына әлеуметтік көмек көрсету шаралары қаралған.
Кеңейтілген семинарда қатысушылар М.Ділдабековаға толғандырған сұрақтарын қойып, АӘК жаңартылған форматы жөнінде сұрады.
-Атаулы әлеуметтік көмек-айлық табысы кедейлік шегінен төмен жеке тұлғаларға мемлекет тарапынан берілетін ақшалай төлем. Ол отбасының әр мүшесіне шаққанда орташа айлық табысы ең төменгі күнкөріс деңгейінің 70 пайыздан аспайтын тұлғаларға тағайындалады. Қазіргі уақытта қазақстандықтар АӘК тағайындау үшін тұрғылықты жердегі халықты жұмыспен қамту орталығына немесе электронды үкімет порталы арқылы құжат тапсыра алады,-деді М.Ділдабекова.
Облыс орталығынан келген қонақ өз кезегінде әріптестеріне жұмыста қырағылық танытып, халыққа заң аясында көмек көрсетуден аянбау керектігін жеткізді.
