Мемлекет басшысы Қасым-Жомарт Тоқаев елдің Бас прокуроры Ғизат Нұрдәулетовті қабылдап, қаңтар оқиғасы жайлы маңызды мағлұматтарды тыңдады.
Бас прокурордың айтуынша, қаңтар оқиғасы тұсында «қашып кеткен» әскерилер тергеліп жатқан көрінеді.
«Тәртіпсіздіктер өршіп тұрған кезде қызметтік ғимараттарды тастап кеткен күштік құрылымдар органдарының лауазымды тұлғаларына қатысты бөлек тергеу жүргізілуде. Осындай әрекеттердің салдарынан Алматы қаласында, Алматы және Жамбыл облыстарында құқық қорғау органдарының арсеналындағы 1500-ден астам қару қылмыскерлердің қолына түскен», — деп хабар таратады Ақорда.
Жалпы алғанда, қаңтар оқиғасы кезінде 3388 қару, оның ішінде 10 аңшылық дүкенінен 1629 мылтық ұрланған. Осының тек үштен бірі немесе 967 қару табылды. Қаруларды іздеу және қайтарып алу жұмыстары жалғасып жатыр. Барлық фактілер бойынша тергеп-тексеру жүргізілуде.
https://bugin.kz/23273-qanhtar-oqighasynda-qashyp-ketken-askeriler-tergeuge-alyndy
