Елімізде орын алған «қаңтар оқиғасы» кезінде Тараз қаласындағы жаппай тәртіпсіздіктердің себеп-салдары мен зардаптары туралы жан-жақты, ауқымды және мазмұнды деректер бар. Бүгінде Жамбыл облысы бойынша 157 сотқа дейінгі тергеп-тексеру істері басталды. Оның ішінде, аймақтағы Полиция департаменті 145 қылмыстық іс тіркеді.
Бұл туралы ӨКҚ алаңында ресми мәлімдеме жасаған облыстық Полиция департаменті бастығының орынбасары Нұржан Рахметуллаев айтты. Ол тәртіпсіздіктер кезінде ведомствоның бірқатар әкімшілік ғимараттары зардап шеккенін де жеткізді. Сонымен қатар, Жедел басқару орталығы істен шыққан, 77 қызметтік автокөлік өртеліп, тағы 72 техника зақымданыпты. Олардың ішінде брондалған автокөлік пен мобильді арнайы байланыс кешені де бар.
«Полиция департаментіне шамамен барлығы 5 миллиард теңге көлемінде шығын келтірілген. Белгілі болғандай, тәртіпсіздіктерге қатысушылар өздерінің агрессивті әрекеттерін тас, металл, таяқ сияқты қолда бар құралдарды қолдана отырып жасаған, «Молотов коктейльдері» де қолданылған. Сондай-ақ полиция қызметкерлері мен Ұлттық ұланның әскери қызметшілері қатты соққыға жығылды, олар ауыр дене жарақаттарын алды. Шұғыл көмек көрсету үшін медициналық мекемелерге 172 полиция қызметкері мен 63 әскери қызметші жүгінуге мәжбүр болды”, — деді Нұржан Рахметуллаев.Ол агрессивті топтың қатыгез әрекеттеріне қарамастан, полиция қызметкерлері ешқандай күш пен атыс қаруын қолданбағанын атап өтті.
Өңірлік коммуникациялар қызметі
