Ағымдағы жылдың 28 ақпанында «102» пультіне қаладағы дүкендердің бірінің күзетшісі хабарласып, белгісіз ер адамның қара пакетпен келіп, дүкенді жарып жіберемін деп қорқытып жатқанын айтқан
Аталған мекенжайға шұғыл жеткен полиция қызметкерлері ғимаратта болған барлық азаматтарды эвакуациялауды жүзеге асырды.
Бүкіл аумақ тексерумен қамтылды, алайда, бомба табылмады. Жедел- іздестіру шаралары барысында 35 жастағы жергілікті тұрғын анықталып, ұсталды. Ұсталған азамат кінәсін мойындады.
Белгілі болғандай, ер адам дүкенге өзі бұрын бірге тұрған таныс әйелімен кездесуге келген. Оны жұмыс орнынан таппай, барлығын бомбамен қорқытпақ болған.
Аталған дерекке қатысты ҚР ҚК 273-бабы (Терроризм актісі туралы көрінеу жалған хабарлау) бойынша сотқа дейінгі тергеу амалдары басталды. Қазақстан Республикасы Қылмыстық-процестік кодексінің 201-бабының талаптарына сәйкес, сотқа дейінгі тергеп-тексеру деректері жария етуге жатпайды.
Жамбыл облысының Полиция департаменті дайындалып жатқан терроризм актісі туралы көрінеу жалған хабарлауға қатысты бес мың айлық есептік көрсеткішке дейінгі мөлшерде түзеу жұмыстары түріндегі жаза немесе бес жылға дейінгі мерзімге бас бостандығын шектеу немесе бас бостандығынан айыру жазасы көзделетінін ескертеді.
