Абай өңірінде дәстүрге айналып келе жатқан “Абай жолы кітапханасы” сериясымен биыл 25 кітап жарық көрді.
Облыстық Абай кітапханасы шығарып келе жатқан бұл серия биыл ұлы Абайдың 180 жылдығына арналды. Атаулы датаға орай, Мұхтар Әуезовтың “Абай жолы”, Қайым Мұхамедхановтың “Абайдың ақын шәкірттері” Светлана Смағұлованың “Қазақ даласындағы жұттар мен ашаршылықтар” қатарлы кітаптар қалың оқырманға жол тартты. Бұл кітаптар облыстағы барлық 137 кітапханаға таратылады.
Абай жолы кітапханасы сериясы – тұңғыштар мекені Семей үшін ескі дәстүрдің жаңғыруы, жақсы жолдың әдемі жалғасы сынды дүние. Себебі, қазақ даласындағы ең алғашқы баспа 1912 жылы Семейде ашылған. Сол жылы баспадан Тайыр Жомартбаевтың “Қыз көрелік” романы, Шәкәрім қажының “Қалқаман-Мамыры” жарық көрді.
Кейін алаштықтардың “Сарыарқа” газеті мен “Абай” журналы да осы баспадан шығып тұрды. Сол ізгі жол бүгінгі “Абай жолы кітапханасы” сериясына ұласты.
Ұлылар мекенінің ізгі дәстүрі жалғасын тапқанына қуаныштымыз. Жаңа кітаптар жақсы оқырманның қадірлі қазынасы болғай!
