🔹Жалпы еліміздегі болып жатқан жағдай әрқайсымыздың жанымызға батып, қабырғамызды қайыстырары сөзсіз. Дегенмен сабырлық танытуымыз керек. Халқымызда «Алтау ала болса, ауыздағы кетеді, төртеу түгел болса төбедегі келеді» деген дана сөз бар. Күні кеше ата-бабаларымыз сан ғасырлар бойы аңсаған Тәуелсіздігіміздің 30 жылдығын атап өттік. Найзаның ұшымен, білектің күшімен жеткен егемендік, азаттықтың әр таңы әрқайсымыз үшін өте құнды. Іргесі мығым мемлекет ретінде атқарылар істер көп. Сондықтан бос ұран, құрғақ сөзге еріп, береке-бірлігімізді қашырып, араңдап қалмауға шақырамын.
🔹Біз үшін Тәуелсіздік құнды қасиетіміз. Сондықтанда сабырлық танытып, кез келген түсініспеушілікті заңды жолмен шешуді қолдайық. 10 қаңтар жалпыұлттық аза тұту күні болды. Қаза тапқандардың жақындары мен туыстарына қайғысына ортақтасып көңіл айтамыз. Енді мұндай азалы күндер болмасын деп тілейік. Ауданымызда «Nur Otan» партиясы атынан сайланған маслихат депутаттары аудандағы саяси ақуалдың тұрақтылығы бойынша ақпараттық түсіндіру топтармен бірге аудандағы ауылдық округтерде елмен кездесіп, түсіндіру жұмыстарын жүргізді. Елге, халыққа үлкен рақмет, дұрыс қарап, түсіністік танытқанына. Сонымен қатар қазіргі таңда ауданда блокбекеттер орналастырылып, аудандық полиция бөлімі, мемлекеттік қызметкерлер, ауданымыздың ерікті азаматтары күні түні демей аянбай еңбек етуде. Аталған азаматтар ыстық тамақпен қамтамасыз етілуде.
🔹Бұдан жаман замандарды халқымыз бастан кешірді. Бір кездері үйлердің барлығы босап, ел туған жерін, үйін тастап, бір үзім нан, бала шағаның қамы үшін ала дорбаны арқалап елден кетті. Мына көз оны да көрді. Көп қабатты тұрғын үйдің терезесінен темір пешті де шығарып отта жағылды, міне бүгін сол ауыртпашылықтар артта қалды. Әлі ел игілігі үшін жасалатын жұмыстар ауқымды. Сондықтан да ел бірлігін, ынтымағын, ертеңін ойлайық ағайын!
Мұратбек Есмұрзаев,
«Нұр Отан» партиясы Сарысу аудандық филиалы төрағасының бірінші орынбасары
