Еліміздің экономикалық саясатының негізгі мақсаты — халықтың әл-ауқатын арттыру, қоғам игілігіне арналған қызмет деңгейін көтеру болса, Қазақстанды өрлету, Әділетті мемлекет болу жолындағы реформа саяси жаңғырудың басты бағдарын қамтиды.
Күні кеше Мемлекет басшысы Қасым-Жомарт Тоқаевтың «ӘДІЛЕТТІ МЕМЛЕКЕТ. БІРТҰТАС ҰЛТ. БЕРЕКЕЛІ ҚОҒАМ» атты Қазақстан халқына Жолдауында айтқан реформалардың бірнеше бағдарлары ҚАЗАҚ ЕЛІН жаңа кезеңге қадам басуға бағыттайды. Мәселен, Ел басшысы шағын және орта бизнесті, яғни жеке кәсіпкерлікті жүйелі түрде қолдап, мейлінше дамыту мен келесі жылдан бастап ауыл тұрғындарының сұранысын қанағаттандыруға арналған «Ұлттық жобаны» жүзеге асыруды тапсырды.
«Ел болам десең, бесігіңді түзе» демекші, ұлт саулығы мен білімді ұрпақтың болашағы үшін айтылған басым бағыттар елімізді алға жетелейді. Білім беру жүйесі- ұлт сапасын жақсарту ісінде аса маңызды рөл атқарады.
Мағжан Жұмабаевтың «Қазақтың тағдыры, келешекте ел болуы да мектебінің қандай негізде құрылуына барып тіреледі.
Мектебімізді таза, берік һәм өз жанымызға /қазақ жанына/ үйлесетін негізде құра білсек, келешегіміз үшін тайынбай-ақ серттесуге болады» деген сөзі бар. Балаларымыздың жан-жақты дамуына қолайлы жағдай жасалып, «Жайлы мектеп» ұлттық жобасының қолға алынып жатқандығы білімді, өскелең ұрпақтың дамыған мемлекеттермен бәсекелес бола алатынын білдіреді. «Ғылымды күшті меңгерген және оны сүйетін мұғалім ғана өз шәкірттерінің бәріне жемісті ықпал жасайтын болады» деп Д.И.Менделеев айтқандай, шәкірттерінің жемісті болу ісінде мұғалімнің де рөлі айрықша екені сөзсіз.
Сондай-ақ, жолдауда денсаулық сақтау саласына біраз реформа жүргізілгендігін, әлі де шешілмей келе жатқан түйткілдердің жоқ еместігіне мән беріп, Үкіметке денсаулық сақтау саласын қаржыландыруды қайта қарауға тапсырма берді. Өйткені, дені сау ұрпақ — қоғамның қуатты күші.
«Медицина — саулықты сақтау, науқасты кеселден айықтыру үшін адам тәнін зерттейтін ғылым» деп Ибн Сина айтпақшы, Денсаулық сақтау саласының халыққа қызмет көрсетуі мен медицина саласындағы дәрігерлерді дайындау жүйесін жетілдіру мәселесінің айтылғандығы — ел болашағы дені сау ұрпақтың қолында екендігін және ұлттың дені сау болса, мемлекет те табысты болатынын білдіреді.
«Бірлігі жоқ ел тозар, бірлігі күшті ел озар» деп атам қазақ айтқандай, біздің алдымызда егемендігіміз бен тұтастығымызды сақтап қалу міндеті тұр. Елімізді алауыздықтан сақтаудың жалғыз жолы — бірлікте болу.
Қазақстан көп ұлтты мемлекет болғандықтан еліміздегі өзге ұлт өкілдерімен тату-тәтті өмір сүріп, өзге мемлекеттерге үлгі болып отырғанымыз да сол татулық пен тұрақтылығымыздың арқасы.
Өздеріңіз оқып, тыңдап, ойға түйіп отырғандарыңыздай, мен де Президентіміздің «Әділетті Қазақстанды құру ісін» бар ынта-жігеріммен қолдаймын және «Жұмыла көтерген жүк жеңіл» демекші, ұлт мүддесі үшін жаңылмай, жығылмай, бір-бірімізге сүйеу болып, Жаңа Қазақстанды құру жолындағы бастамаларды халық болып қолдауға шақырамын.
Саяси жаңғырудағы бағыт-бағдардың табысты жүзеге асуына атсалыссақ, еліміз одан әрі дамып өркендейтініне сенемін!