5 наурыз – Қазақстанда АХАТ қызметкерлері күні атап өтіледі. Осыған орай елордадағы салтанат залында бүгінгі таңда еңбек етіп жатқан қызметкерлер мен ардагерлер, сондай-ақ отбасылық өмірдің мерейтой иелері мен жас жұбайлар жиналды.
Іс-шара барысында «Азаматтарға арналған үкімет» Мемлекеттік корпорациясының Басқарма Төрағасы Арман Кенжеғалиев қызметкерлер мен ардагерлерге олардың өлшеусіз еңбегі, кәсібилігі мен адалдығы үшін алғыс білдірді. Одан кейін ортаға Мендельсон маршының сүйемелдеуімен жарты ғасырлық және ширек ғасырлық отбасылық өмірді артқа тастаған жұптар шақырылды. Оларға «Азаматтарға арналған үкімет елтаңбалы мөрі қойылған неке куәлігінің телнұсқасы табысталды. Өз кезегінде мерейтой иелері отбасылық өмірге қадам басқан жас жанұяға жылулық пен берекені бейнелейтін Отау – киіз үйді сыйға тартты.
«АХАТ қызметкерлерінің жұмысы – қоғам үшін аса маңызды. Мәселен, 2024 жылы 125 544 неке тіркеліп, 388 032 сәбиге туу туралы куәлік берілді. Ал жыл басынан бері 16 023 неке мен 56 629 туу тіркелді. Естеріңізге сала кетейін, 2023 жылдың 1 шілдесінен бастап АХАТ бөлімдері «Азаматтарға арналған үкімет» Мемлекеттік корпорациясының қарамағына берілді», – деді «Азаматтарға арналған үкімет» Мемлекеттік корпорациясы» Басқарма төрағасы Арман Кенжеғалиев.
Айта кетейік, бұл күні тек елордада ғана емес, бүкіл ел бойынша жүйедегі қызметкерлерді марапаттауға арналған салтанатты іс-шаралар өтті. Оларға ҚР Цифрлық даму, инновациялар және аэроғарыш өнеркәсібі министрінің, Мемлекеттік қызметтер комитетінің құрмет грамоталары мен «Азаматтарға арналған үкімет» Мемлекеттік корпорациясының Басқарма Төрағасының алғыс хаттары табыс етілді. Жалпы, Қазақстан бойынша 47 қызметкер марапатталды.
Бүгінде еліміздегі АХАТ жүйесінде 825 қызметкер еңбек етеді. Олар мемлекет үшін аса маңызды функция – адамның өміріндегі басты оқиғаларды, соның ішінде тууды, некені, бала асырап алуды және өзге де тіркеулерді қамтамасыз етеді.
