Тіл — қай халықтың болмасын рухани қазынасы. Тілді ұлт болып жасаған. Тілі жоқтың — ұлты жоқ. Ұлты жоқтың бойында ұлттық қасиет жоқ. Иә, тіл — адамдар арасындағы аса маңызды қарым-қатынас құралы, тілсіз қоғам, қоғамнан тыс тілдің болмайтынын ескерсек, аумағында 100-ден аса ұлт өкілдері тұратын Қазақстанда шын мәнінде бұл мерекенің қаншалықты маңызды екенін айтпасақ та болады. ҚР Үкіметінің 2017 жылғы 31 қазандағы «Қазақстан Республикасында мереке күндер тізбесін бекіту туралы» №689 қаулысының негізінде, айтулы мерекелердің арасында Қазақстан халқы тілдері күні 5 қыркүйекте тойланатын болып бекітілген. Айта кету керек, тіл мерекесінің 5 қыркүйек болып белгіленуінің де өзіндік себебі бар. Бұл күн – «Ұлттың сақталуына да, жоғалуына да себеп болатын нәрсенің қуаттысы – тіл» деп ұлағатты сөз қалдырған, қазақ халқының тағдыры, тілі үшін күрескен Алаш арысы, Ұлт ұстазы Ахмет Байтұрсынұлының туған күні.
Мұқағали Мақатаев атындағы тірек орта мектебінде 6-16 қыркүйек аралығында Қазақстан халқы тілдер күні мерекесіне арналған «Ахмет Байтұрсынұлы және Мәңгілік ел — Мәңгілік тіл» тақырыбында тілдер апталығы өтті. Бұл апталықта іс-шаралар қазақ, орыс және ағылшын тілдерінде өткізілді. Аталмыш апталық аясында бекітілген жоспар бойынша мектептің тіл мамандары Қазақстанда тұратын барша халықтың тілін, мәдениетін, салт-дәстүрін қорғауға және дамытуға бағытталған түрлі іс-шаралардың өтуіне белсене атсалысты.
Апталықтың ашылу салтанатында ҚР Әнұраны шырқалды. Жиында сөз алған мектеп директоры Алтынкүл Сихимова тәуелсіз елдің мемлекеттік тілі мәртебелі де тұрақты болып, өрістеп дамуына үлес қосу — жас жеткіншектердің жауапкершілігінде болатын міндет екендігіне тоқталып, ана тіліміздің мерейлі мерекесімен құттықтады.
Елімізде ұлтымыздың ұлы тілімен қатар әлемдік тілдердің де құндылығы жоғары. Қазақ балаларының өзге тілді меңгергеніне қуанып, өзге ұлт өкілдерінің қазақ тілінде сөйлеп, білім алып жатқанын көргенде бір жасап қаламыз. Ұстаздар қауымының басты міндеті — шәкірттерін білім нәрімен сусындатып, болашақ ұрпаққа ұлағатты тәрбие беру.
Іс-шара жоспарына сәйкес «Ахмет Байтұрсынұлы — қазақ тіл білімінің атасы», «Латын әліпбиінің негізін қалаушы» атты тәрбие сағаттары өткізілді. Сынып сағаттарының алға қойған мақсаты — оқушылардың тіл туралы білімдерін жетілдіру, өз тіліне, туған жеріне құрмет көрсетуге баулу және оқушылардың азаматтық, адамгершілік, ізгілік қасиеттерін, ұлттық рухани санасын, эстетикалық биік талғамын, өмірлік тәжірибесін байытып, тілімізді құрметтеп, аялай білуге тәрбиелеу болмақ.
«Тілім — менің тірегім» тақырыбында мұғалімдер арасында дөңгелек үстел өтті. ХХ ғасырда азаттық пен бостандық жайында сөз болса алдымен ел мақтанышы Ахмет Байтұрсынұлы есімізге түсетіні анық. Дөңгелек үстел барысында, Ахмет Байтұрсынұлы өмірі жайында біраз мағлұмат беріп, ұстаздар өз ойларымен бөлісті. Сондай-ақ, А.Байтұрсынұлының саяси қызмет жолы мен қазақ тіліне қосқан үлесі жайында сөз қозғалды. Осы мақсатта қазақ тілі пәнінің мұғалімдері «Тіл – ұлтаралық қатынас құралы» тақырыбында этнос өкілдерімен конференция сабақ ұйымдастырса, тарих пәнінің ұстаздары «Атадан қалған асыл сөз» тақырыбында ашық сабақ өткізді. Тіл мерекесінің жоғары деңгейде өтілуіне 1-11 сынып оқушылары да атсалысты. «Тілге құрмет — елге құрмет» тақырыбында онкүндіктің жабылу салтанатында оқушылар өздерінің музыкаға деген қабілеттерін аңғартып, ән мен жырдан шашу шашып, қазақтың ұлттық биін мың бұрала биледі.
Осылайша Қазақстан халқы тілдері күні мерекесіне орай мектепте өткізілген осындай іс-шаралардың өңірімізді мекендеген сан түрлі ұлт өкілдерінің арасындағы достық қатынасты одан әрі нығайтып, бірлігіміз бен татулығымызды сақтауға игі ықпалын тигізетіні анық.
Жадыра КАДРБЕКОВА,
М.Мақатаев атындағы тірек орта мектебінің (РО) қазақ тілі мен әдебиет пәні мұғалімі.
