Бүгін – ұлттық домбыра күні. Бұл күн – ұлттық рухты жаңғыртып, өткен мен бүгінді жалғайтын қасиетті саз аспабымызға деген құрметтің белгісі.
Атаулы күнге орай, «Қоғамдық келісім» мекемесі мен өңірлік ҚХА Аналар кеңесі жылдағы дәстүрге сай «Айналайын» акциясы аясында облыстық перинаталдық перзентханаға барып, мереке күні дүние есігін ашқан сәбилердің аналарына құрмет көрсетті. 2019 жылдан бері желісі үзілмеген шара барысында аталмыш мекеме басшысы Мубарак Қасымқызы, «Жобаларды іске асыру және ҚХА құрылымдарымен жұмыс бөлімінің» басшысы Аққу Қаратаева, аймақтық Ассамблеяның Аналар кеңесінің белсенді өкілі Аракси Плетневалар Жанар, Раиля және Дария есімді жас аналарға ақ жаулық жауып, ұлттық аспабымыз – домбыраны сыйға тартты.
Сондай-ақ, ұлттың үні сынды аспаптың бар қасиеті сараланған және биыл ұлықталып жатқан халқымыздың ардақтылары Әлия, Міржақып, Абай сияқты тұлғалардың мемлекетшіл қасиеттері дарысын деген ізгі тілекті үндеу-парақ табысталды.
«Тәрбие — тал бесіктен» қағидатын ұстанатын Ассамблея Аналарының бүгінгі жас аналарға басты тілегі – ұрпақ тәрбиелеуде қай этнос болмасын оған, өзінің туған елі, туған жерінің рухани мәдениетін сыйлатып өсіру болса, перзентханаға келуінің мақсаты – ұлттық құндылықтарды қастерлеу, көпмәдениеттілік пен жалпықазақстандық ұлттық бірегейлікті сақтау, ұрпақтар сабақтастығын жалғастыру және дүние есігін ашқан нәрестелердің бойында патриоттық сезімді дарыту тілеулестігі еді.
Ұлттық аспапты ұлықтауға арналған аймақтық ҚХА Аналарының игілікті істері аудандар да жалғасын табуда.
Айта кетейік аталмыш шара барысында күні бүгінге дейін 80-нен аса домбыра сыйланды.
