Өткен аптада аудандық Ж.Қуанышбаев атындағы музейде музей ұжымы мен аудандық архив қызметкерлерінің бірлесе ұйымдастыруымен «Қайсар рухты – Қайрат» атты тақырыпта дөңгелек үстел басындағы басқосу өтті. Басқосуды музей директоры Ләйла Шәйбайқызы Қожагелдиева кіріспе сөзбен ашып, Қ.Рысқұлбековтің өмірбаянына тоқталды. Содан соң Халық қаһарманын бір минуттық үнсіздікпен еске алды. Басқосуға қатысқан желтоқсаншылар Ләйлә Қожагелдиева, Закира Мүлкібаева, Шарагүл Қожабекова, Гауһар Әйтімова қазақ қоғамының тарихында елеулі өзгеріс әкелген Желтоқсанның ызғарлы күндері жайлы бастарынан кешкендерін еске алды. Сондай-ақ басқосуда аудандық архивтің директоры Меруерт Хамитова және осы жолдардың авторы Қайрат Рысқұлбеков, Желтоқсан оқиғасы жайлы өз ой-пікірлерін ортаға салды.
Басқосуда мектеп оқушылары Талғат Кальбинур Қ.Рысқұлбековтің «Түрмеде жазған өлеңі», Фариза Шекербай «Атам десең атыңдар», Айзере Сағатай «Ана тілі», Әмина Мұрат «Кездесеміз әлі де» өлеңдерін нақышына келтіріп оқыды.
Басқосу соңында музей директоры Ләйла Қожагелдиева белсене қатысқан оқушыларға Алғыс хат, сыйлықтар табыс етті.
Жолдыбай ДӘМЕТОВ,
«Мойынқұм таңы»
