Асқар Тоқпанов атындағы Жамбыл облыстық қазақ драма театрының артисі, ҚР Мәдениет қайраткері, «Ерен еңбегі үшін» медалінің, «Облысқа сіңірген еңбегі үшін» белгісінің иегері Әлімбеков Жүніс Нұрғазыұлының 60 жасқа толуына орай актердің 40 жылға жуық сахна өнеріне арнаған шығармашылық жолын тереңірек таныту мақсатында «САХНА-ДӘУРЕН» атты шығармашылық өнер кеші өтті,-деп хабарлайды Шаңырақ инфо Асқар Тоқпанов атындағы Жамбыл облыстық қазақ драма театрының әлеуметтік желідегі парақшасының жазбасына сүйеніп…
Кеш барысында актердің балалық, жастық шағынан, студенттік жылдарынан, «Желтоқсан ызғарына» үн қосқан кездерінен, сондай-ақ, шығармашылық жолында әр кездері сомдаған басты және негізгі рольдерінен көрініс беретін театрландырылған қойылым көрсетілді.Соңынан актер Әлімбеков Жүніс Нұрғазыұлының құрметіне арналған құттықтауларға, марапаттауларға кезек беріледі.
Мерейтой иесіне арнап, құттықтау сөз сөйлеген Жамбыл облысы әкімінің орынбасары КӘРІБЕК Дәулет Жамаубайұлы актерға облыс әкімінің және Қазақстан Республикасы мәдениет және спорт министрінің құттықтау хаттарын табыстап, иығына шапан жапты.
Жалынды құттықтау сөзін жеткізген Қазақстан Театр қайраткерлері одағының төрағасы, Қазақстанның халық артисі, Мемлекеттік сыйлықтың лауреаты, өнертану кандидаты, профессор ЖАМАНҚҰЛОВ Тұңғышбай Қадырұлы осы жуырда ғана Қазақстан Театр қайраткерлері одағының жүйріктердің жүйрігіне ғана берілетін жаңа наградасы – «ДАРА» медалі шығарылғанын хабарлап, осы медальдің ең алғашқы №1-номерлері – актер Жүніс Әлімбеков пен белгілі режиссер Қуандық Қасымовқа беріліп отырғанын қуанышпен жеткізді. Және Асқар Тоқпанов театрының осы қос пырағының омырауларына № 1-ші номерлі «ДАРА» медалін қадап, кәуліктерін табыс етті. Мерейтой иесі Ж.Әлімбековтің иығына өз атынан шапан жапты.
«Нұр Отан» партиясы Жамбыл облыстық филиалы төрағасының орынбасары МӘТЕН Мади Мейірбекұлы да актер Жүніс Әлімбековке партия атынан құттықтау адресаты мен сый-сияпатын тарту етті.
«Қазақстандық салалық мәдениет, спорт, туризм және ақпарат қызметкерлерінің кәсіптік одағы» Жамбыл облыстық филиалының төрағасы БЫҚЫБАЕВ Дүйсеналы Дыбысалыұлы мерейтой иесіне Республикалық кәсіптік одақтардың «Еңбек даңқы» белгісін тапсырып, шапан жапты.Жамбыл облысы Ардагерлер Кеңесінің бөлім басшысы Сайлаухан АШАНОВ та мерейтой иесіне Ардагерлер кеңесінің төсбелгісін тапсырып, шапан кигізді.Жамбыл облысындағы «Желтоқсан-86» қоғамдық бірлестігі төрағасы Исмайл ХАДЖИМУРАТОВ та актер мерейтойына орай ыстық ықыласты құттықтауын жеткізіп, «Желтоқсан қозғалысының – 35 жылдығы» медалі мен сый-сияпаттарын табыс етті. Ол, «Желтоқсан қозғалысының – 35 жылдығы» медалімен, сондай-ақ, «Желтоқсан желі» әнінің авторы Әбиірбек Тінәліні де марапаттады.
Облыстың белгілі спортшысы, спорт ардагері, мерейтой иесінің бала күнгі досы Жұмахан НҰҒЫМАНОВ актер Жүніс Әлімбековтің спортқұмарлығын ескеріп, оған спорт жейдесін тарту етуді ұйғарғанын жеткізді.Кеш барысында Жамбыл облыстық филармониясының әншілері әннен шашу шашып, мереке сәнін келтіре түсті.Кеш соңында: театр актерларының орындауында Тұңғышбай Жаманқұлов ағамыздың репертуарындағы тамаша музыкалық туындының бірі — «Өнер адамы» әні шырқалды.
