Тараз қаласының әкімі Бақытжан Орынбеков шаһар аумағындағы тұрғын алқаптарды ауызсумен қамтамасыз ету жұмыстарының барысымен танысты.
Ең әуелі шаһар басшысы «Ақжол», «Қайнар», «Мичуринец», «Родничок» алқаптарына ат басын бұрды. Қазіргі таңда «Ақжолдағы» жұмыстар 95 пайызға аяқталса, өзге алқаптардағы құрылыс барысы қарқынды жүруде.
Өз кезегінде қала әкімі су құбыры толығымен жүргізіліп біткен алқаптарда абоненттеу жұмыстарын бастап, тұрғындарды тіршілік нәрімен қамтамасыз етуді жеделдету қажеттігін айрықша атап өтті.
Бұдан кейін шаһар басшысы «Түркісіб» алқабына барды. Бүгінде Жамбыл ауданынан қосылған елді мекенде орталықтандырылған ауызсу жүйесі тартылғанымен, іске қосылмаған. Осыған орай мұндағы су ғимараттары ауданнан қабылданып алынған. Қазір ақаулары анықталып, су беруге қатысты жұмыс қарқынды жүргізіліп жатыр. Бүгінге дейін 170-ке жуық үй абоненттеуден өткен.
Келесі кезекте Бақытжан Әмірбекұлы «Шалғай Қарасу» алқабына аялдады. Бүгінгі күні «Шалғай Қарасу-1, 2, 3, 4, 5, 6, 7» алқаптарында ауызсу жүйесі барлық көшеге толығымен тартылып, қазіргі таңда абоненттеу, есептеуіш құралдарды орнату жұмыстары жалғасын табуда.
Сонымен қатар шаһар басшысы «Шаңырақ» алқабындағы орталықтандырылған ауызсумен қамтамасыз ету жұмыстарына да назар аударды. Қала әкімі өз сөзінде алқап тұрғындары ағымдағы жылдың 1 қарашасына дейін ауызсуға қол жеткізуі қажеттігін атап өтіп, бұл бойынша жауапты тұлғаларға нақты тапсырмалар жүктеді.
