Алғыс айту күні мерекесіне орай Тараз қаласындағы Достық үйінде салтанатты жиын өтті. Шараға облыс әкімінің бірінші орынбасары Бекболат Орынбеков, облыс әкімдігі Ішкі саясат басқармасының басшысы Берік Құрманғали, «Нұр Отан» партиясы облыстық филиалы төрағасының орынбасары Шәбден Тілеумұрат, Қазақстан халқы Ассамблеясы облыстық хатшылығының жетекшілері және өңірдегі түрлі этностық бірлестік жетекшілері қатысты.
Аумалы-төкпелі заманда ата қоныстан жыраққа жер аударылған түрлі ұлт өкілдеріне пана болған қазақ халқына алғыс айтылған мерекелік кеш түндігі депортация туралы театрландырылған қойылыммен түрілді. Одан соң облыс әкімінің бірінші орынбасары сөз алып, бұл мерекенің мән-мазмұнына тоқталды.
– Қазақстан халқы Ассамблеясының ХХІІ сессиясында Елбасы ұсынысымен 1-наурыз Алғыс айту күні деп жарияланды. Бұл мерекені көпшілік ыстық ықыласпен қабылдады. Сол бір қиын-қыстау заманда Қазақстан өзі ауыр экономикалық жағдайда болғанымен Кавказдан, Сібірден, Повольжеден жер аударылған түрлі ұлт өкілдеріне көмек қолын созды. Олар тарихи отанына қайта қоныс аударғанымен тар заманда бір түйір дәнді бөлісе жеген ұлт өкілдерінің қазақ халқының жақсылығын ешқашан ұмытпайды. Жер аударылғандармен тұрмыс тауқыментін бірге тартып, қиындықты бірлесе жеңген қазақ ауылдарындағы ақсақалдар мен ақ жаулықты аналар кейінгі ұрпаққа қандай сәтте болмасын адамгершілік пен мейірімділікті жоғалтпаудың үлгісін көрсетті. Тағдыр тәлкегімен Қазақстанды екінші Отанына айналдырған этностар да еліміздің өсіп-өркендеуіне үлес қосып келеді, – деді Бекболат Серікбекұлы.
Мұнан соң кеш концерттік бағдарламаға ұласып, этнос өкілдері өз өнерлерін көрсетті. Көпшілік «Қазағым менің» әнін нақышына келтіре орындаған бүлдіршін Болатбек Мухрабтың өнеріне ризашылықпен қол соқты. Сондай-ақ «Юлдузча», «Үкілім-ай», «Дэймакх Stayle» би ансамблдері өзбек, татар, лезгинка билерін мың бұрала биледі.
Шара соңында әр этностың өкілдері қазақ халқына алғысын жеткізіп, этномәдени бірлестіктерден құралған ансамбль «Өз елім» әнін орындады.
Ш.Атыханұлы
