Із-түзсіз жоғалып кеткендер туралы 106 өтініш түскен
Алматыда жаппай тәртіпсіздік кезінде із-түзсіз жоғалған 48 жан табылды. Бұл туралы Lider.kz волонтерлер қозғалысының жетекшісі Дильмира Блац мәлімдеді, деп хабарлайды Шаңырақ инфо ҚазАқпаратқа сілтеме жасап.
«Біз із-түзсіз жоғалып кеткендер туралы 106 өтінш қабылдадық. Оның 48-і табылды. Қазір біз адамдарды іздестіру жұмыстарын белсенді түрде жүргізіп жатқан жоқпыз. Тек егде жастағылар мен балаларды табуға көмектесіп жатырмыз», – деді қозғалыс жетекшісі.
Еріктілер бірінші кезекте аурухана, полиция, мәйітханаға хабарласып, жоғалған адам туралы ақпаратты нақтылайды. Ол жақтан табылмаған жағдайда ғана аты-жөні, фотосы көрсетілген парақшаларды көшелерге іледі.
Еріктілердің айтуынша, жоғалған адамдардың басым бөлігі қамауда. Дильмира Блац бірінші қаңтар күні жоғалып кеткен 13 жастағы жасөсіпірімді тапқандарын айтты.
«Осыдан екі күн бұрын біздің қыз-жігіттер бірінші қаңтар күні жоғалып кеткен 13 жастағы баланы тапты. Жасөсіпірім аман-есен. Ол осы уақытқа дейін әуежай аймағында адасып жүрген», – дейді ол.
Сондай-ақ бүгін Lider.kz волонтерлері қан тапсырып, өртеніп кеткен әкімдік ғимаратын тазалауға атсалысуда.
