Мемлекеттік хатшы Ерлан Қарин Қаңтар оқиғасына қатысты «Qazaqstan» телеарнасына берген сұхбатында 20 мың террористтің кімдер екенін айтты, деп хабарлады turkystan.kz.
Журналист «Алматыға шабуылдады деген 20 мың террористер кімдер? Әуежайды басып алса да, өз талаптарын айтпаған қарулы топтар мен қаза тапқандардың мүрдесін ұрлап кеткен қандай террористер?» деген сұрақ қойды. Бұл сұраққа Ерлан Қарин толығырақ жауап берді.
«Бұл жерде мына нәрсені ашып айту керек. Біз әдетте террорист дегенде белгілі бір образдағы адам елестейді. Қару асынған, әскери киім киінген адам деп талдайды. Соңғы болған оқиғаларда да стереотиптер тұрғысынан қабылдап, қалай елімізге осынша террористер кіріп кетті деді. Терроризм тақырыбын талдағанда идеологиялық себептерін іздеп, әуестеніп жатамыз. Терроризм – идеология емес, іс-әрекет. Соңғы болған оқиғаларда әкімшілік ғимараттарды, әлеуметтік нысандарды басып алу, әскерилерге қарулы шабуыл, ақпараттық нысандарға шабуыл террористтік акт ұғымын білдіреді. Шетелде басқа да анықтамалар қолданылады», – деді ол.
https://turkystan.kz/article/166828-166828/
