Быт-шыты шыққан автобус, тоналған инкасатор көлігі, Ұлттық ұланға тиесілі өртенген УАЗ автомобильдері барлығы осында. Одан бөлек жеке азаматтардың да оншақты автокөлігі тұр.
Ішінде желтоқсаншылар жанып кеткен кроссовер де осы автотұраққа орналастырылған. Бұл көлікке республика алаңы маңында оқ атылған еді. Жауған оқтан техника өртеніп, ішінде отырған егде жастағы жұбайлар тірідей жанып кеткен болатын.
Мұндағы өртенген автокөліктерден бөлек, бірнеше жерінен оқ тиіп, шұрық-тесік болған машиналар да жетерлік. Мәселен тұрақ алаңындағы Mercedes-Benz Gelandewagen қатты қақтығыстың ортасында қалып қойған секілді. Әйнектері сынған, біраз бөлігіне оқ тиген. Тіпті салонынан әлі де қан іздерін көруге болады.
Автотұрақта қазір тергеушілер жұмыс істеп жатыр. Олар қаңқасы қалған көліктер кімге тиесілі екенін корпус нөмірлері арқылы анықтайды.
Мұндағы тәртіпсіздіктен залал келтірілген техникалардың шығыны бірнеше миллиондарға бағаланатыны анық.
