Алматыдағы балабақшада балаларға күйіп кеткен картоп берілген. Ата-аналар тамақтың сапасына шағымданды, — деп хабарлайды Massaget.kz тілшісі КТК» телеарнасына сілтеме жасап.
Ата-аналар кеше ұл-қыздарына күйген картоп беріп жатқан кезде барғанын айтады. Оны жеген балалар өзін жайсыз сезінген. Бірі құсып, енді бірінің іші ауырған. Олар бұған дейін де балабақша асханасынан күйіктің иісі жиі шыққанын айтады. Ал мекеме меңгерушісі мұның бәрін жоққа шығарып отыр. Қазір бұл іс бойынша тексеріс жүріп жатыр.
«Кеше баламды алып кетуге келген кезде алдымнан жүгіріп шықты. «Мама, тамақ ішкенде құсып тастадым, түкіріп тастадым, оның ішінде боқ болды» дейді. Онысы несі дедім. Сол жерде тамақтарды жинап жатыр екен, есік ашық тұрды. Мен ана тамақты көріп, шошып кеттім. Жап-жасыл картошка, асты қатты күйіп кеткен», — деді тәрбиеленушінің анасы Раушан Жұрынбаева.
Тілі шыққан ұл-қыздар «қара түсті фри» жегенін айтыпты. «Олар осыдан соң өзін жайсыз сезінді», — дейді наразы ата-аналар.
Перзентінің денсаулығына алаңдаған ата-аналар мән-жайды меңгерушіден білуге тырысты. Олардың сөзінше, бейсенбі мәзірінде балаларға балықтан жасалған тағам ұсынылуға тиіс болған. Жаңа меңгеруші келгелі мемлекеттік балабақшада қордаланған мәселе көп, — дейді ата-аналар.
Олар көкейдегі сан-сауалға мекеменің басшысынан жауап алуға тырысты. Ал меңгеруші сол сәтте жұмыс орнымда болдым деп сендірген. Бірақ балаларға қуырылған картоп беріліп жатқанда қайда қарап отырғанын түсіндіре алмады. Тіпті мұндай тамақ ұсынылғанын жоққа шығарып отыр.
Ауданның білім басқармасының басшылығы қазір тексеріс жүргізіп жатыр. «Жеуге жарамсыз картоптың кішкентайларға ұсынылғанын камерадағы жазба да растады», — дейді мамандар. Негізі мұндай ас балабақша мәзірінде мүлдем болмауы керек екен.
«Қазір білім басқармасының бұйрығымен тексеріс тобын құрдық. Таңғы жетіден бастап тексеріп жатыр, қосымша екінші топ келе жатыр. Мәзірде негізі картоп берілмеуі керек. Сол үшін бәрін қараймыз. Меңгеруші бақыламаған, қарамаған», — деді Медеу ауданы білім бөлімінің басшысы Ақнұр Нұрәлиева.
Ата-аналар Е-өтініш платформасы арқылы бірнеше ведомство өкілдеріне шағым жіберіпті. Ол: Медеу ауданы санитарлық-эпидемиологияны бақылау басқармасы, Алматы білім басқармасы, Сыбайлас жемқорлыққа қарсы іс-қимыл агенттігінің департаменті.
Тексеру тобы мониторинг қорытындысын жақын күндері жарияламақ. Сондай-ақ ата-аналармен арнайы жиналыс өткізіледі.
https://massaget.kz/news/almatyidagyi-balabakshada-balalarga-kuyp-ketken-kartop-123924/?fbclid=IwY2xjawH4mFRleHRuA2FlbQIxMQABHXwFdZADVsq0AVDPnMeUiItk0awvR2ySLSVrMoppOi7rv4SlkvHfbVPesw_aem_pd9kLKDrimQEfbbwjj3eFg
