Ауданымызда көп балалы ана атанып, халық санын көбейтуге үлес қосып жүрген аналарымыз көп. Солардың бірі — Жаңатас қаласының тұрғыны, 7 баланы өмірге әкелген алтын құрсақты ана — Кулбаева Бақыткүл Сенбайқызы.
Алтын алқа иегері 1984 жылдың 12 наурызында Жаңатас қаласында дүниеге келген. Өмірлік мақсатын нық ұстаған аяулы жан 2006 жылы 8 сәуірде жолдасы Айдос Искаковпен бірге отау құрады. Алланың бергенінен берері таусылмасын дегендей, бақытты әрі тату тәтті жұптың шаңырағына құт қонып, көпбалалы ана атануды нәсіп еткен екен. Нәзік жанды аудандық орталық аурухананың мейірбикесі болып қызмет атқарады. Бүгінде бала күтіміне байланысты, еңбек демалысында. Жолдасы Айдос Абдуманапұлы жеке шаруашылықтарда жұмыс атқарады. Темірден түйін түйіп, қара жұмыста шыңдалған азамат бар жылуын отбасына арнап жүр. Отағасын ерім деп сыйлайтын мейірімді әйелдің бар тілегі бала шағаның амандығы. 5 ұл мен 2 қызды өмірге әкеліп, ана атану сезімін жасырмаған Бақыткүл ханым: — Балалы үй базар демекші, үйдің бар жылуы да, шамшырағы да менің балаларым. Көп балалы ана атануды қазіргі жастар құп көрмей жатады. Дегенмен, әр баланың өз несібесі болады дегенді ұмытпауымыз керек.
Бүгінгі аналар күні мерекесіне орай, барлық аналарға тілерім дендеріңіз сау болсын, шаңырақтарыңыздан шаттық кетпесін, — деп жылы лебізін білдірді. Биыл 41 — ге толған әйел құдай беріп жатса ана атанудан қашпайтынын айтты. Өткен жылы «Жастар ресурстық орталығының» қызметкерлері Отбасы күніне орай, берекелі шаңыраққа кіріп, сый -сияпат көрсеткен болатын. Бұл да көп балалы анаға деген құрметтің белгісі екені даусыз. Ендеше, отбасының шырағын сөндірмей жүрген Бақыткүл Сенбайқызын да біз де мерекемен құттықтай отырып, отбасына амандық тілейміз.
Сарысу ауданы
