«Алматы трагедиясы» атауымен тарихқа енетін қаңтар оқиғасы қай-қайсымызға да оңай тимеді.
Елімізде мұндай қайғылы жайттың орын алуына ең әуелі еркіндікті еркінсу деп ұғатын орашолақ ойсыздығымыз себеп. Әйтпесе бейбіт шеру дегеніміз — демократиялық бағыт ұстануы тиіс әрекет болатын. Бірақ осыны анталап қаумалаған асығыс жұрттың елірген ереуілге ұластыруы саяси сауатсыздықты ғана емес, бейбастақ тәрбиесіздікті де көрсетеді.
Бұл сөзімізге, орынды талаптарын қоя білген жаңаөзендіктердің басқа аймақтардағы шерушілерді, шерушілерге ерушілерді «Бізге ондай «қолдауларың» көк тиынға керек емес!», «Тоқтатыңдар бассыздықты!» деп пәтуаға шақыруы дәлел.
Ақылы бар адам осылай етсе керек еді.
Өз мүдделерінің орындалуына қол жеткізген жаңаөзендіктер жиылған митингілерінен ерікті түрде тараған соң, артында қалған кең алаңқайды шашпай-төкпей, сыпырып-сиырып, бірнеше күн түнеген жерлерінде қыл қиқымын да қалдырмай тазалық орнатып кетті.
Ал басқа өңірде бас көтергендер өздерінің айғайға сүрең қосқан аттаншылдықтарынан от шығартып, деструктивті арандатқыштардың ықпалымен өрт қаулатып алғандарын білмей де қалды.
Жалған популистердің бұл осалдықтарын сұғанақ көзді сыртқы күштер оп-оңай пайдаланып үлгерді.
Қанша ғимараттар іске алғысыз боп қалды.
Тып-тыныш тұрған ортақ мүліктер, мемлекеттік мекемелерде не әкелерінің құны бардай қиратты?
Автокөліктер, техникаларды тоз-тоз қып, әскери, әкімшілік, әлеуметтік нысандарға шабуыл жасап, жүздеген бейбіт тұрғындар мен әскери қызметшілердің денсаулығы мен өміріне қатер төндірген лаңкестердің содырлығы құдай алдында да ақталмас.
Қаза тапқан сәбилер мен азаматтардың қайғыдан қара жамылған отбастарының көз жасы қалай тиылмақ.
Мақұл, оның бәріне уақыт емші дейік. Бірақ біз өз дамуымызды керісінше біраз уақытқа тежеп алдық.
«Жаман әңгіменің жалауы тез желбіреп», «ауласынан алыстап көрмеген адамның ойы есігінен де аспайтынын» байқатты.
Абырой болғанда, ел заңына бағынбағандармен сөздің басқаша болатынын сездірген Президентіміз жедел қимылдап, шұғыл шешімдерді қолға алды. Қатаң шараларға көшті. Республика бойынша төтенше жағдай жарияланылып, блок бекеттер қойылды. Террористерге қарсы арнайы операциялар жүргізілуде.
Жалпы жағдай орнықтырылды. Бірақ босаңсуға болмайды. Қасым-Жомарт Тоқаев айтқандай,
«Бұл оқиға мемлекетіміздің тұрақтылығы мен қауіпсіздігін сынаудың бір түрі болды».
Ендеше осы ауыр сынақ өлшеусіз сабақ. Енді мұндай бассыздық пен ессіздікке жол берсек тарих бізді де кешірмейді.
Сергелдең жүректер басылып, бейқам саналар серпілсін.
Үміт БИТЕНОВА, ақын,
Қазақстан Жазушылар одағының мүшесі.
