АНАЛАР МӘРТЕБЕСІН КӨТЕРУГЕ АРНАЛДЫ

Өткен аптада Мырзатай ауылдық округінде «Ауыл аналарының мәртебесі» атты аудандық семинар өтті. Алдымен қатысушылар  Мырзатай ауылдық округі әкімшілігінің ауласына қойылған ұлттық тағам түрлері, қол диірменді пайдаланудың қыр-сыры, күбі пісу, қолөнер шеберлерінің бұйымдарымен танысты. Бұдан кейін негізгі шара ауылдық клубта жалғасты.
Мырзатай ауылдық ардагерлер кеңесінің төрағасы Амангелді Әлімбаев шараның маңыздылығына, оның ауыл жастарына тигізер пайдасына тоқталды. Әрмен қарай жиынға келген облыстық ардагерлер кеңесі төрағасының орынбасары Шәріп Дәулетбаев, облыстық аналар алқасы төрайымының орынбасары Нұркүл Оспанбекова, облыстық мәслихат депутаты Сәуле Рысбаева, аудандық мәслихат депутаттары Алмас Болшыбеков, Бағдат Момынов, аудандық ардагерлер кеңесінің төрағасы Серік Ермеков, аудандық аналар алқасының төрайымы Шырын Қапаровалар  ретімен сөз алып, ауыл аналарының мәртебесін көтеру, аналардың бала тәрбиесіндегі рөлі, жастармен жұмыс жөніндегі ойларымен бөлісті. Маңызды мәселеге арналған шараны ұйымдастырған ауылдық аналар алқасының төрайымы Ұланбике Сейдуалиеваға алғысын жеткізді. Алдағы уақытта мұндай тәлімі мол жиынның жалғасын табатынын  атап өтті.
Семинарда ауыл тұрғыны Әбілсейіт Момбаев өзінің «Тәуелсіздік» күйін орындаса, мың бұралған балғын бишілер «Испан» және «Қазақ» билерімен көрермендерді тәнті етті. Сонымен қатар шараға белсене атсалысқандарға «Ауыл» партиясының  өкілдері Алғыс хаттар мен гүл шоқтарын тапсырды.

Арайлым Қасқырбайқызы.