Апельсин шырынының зияны тиюі мүмкін – кардиологтар ескертеді: 6 қаңтар 2026, жаңалықтар Turkystan.kz
Апельсин шырыны көпшілік үшін денсаулықтың символы. Таңғы асқа бір стақан шырын – дұрыс әдет сияқты көрінеді. Бірақ жүрек тұрғысынан қарасақ, бұл әдет әрдайым бірдей пайдалы емес. Мәселе шырында емес, оның қалай және қандай күйде тұтынылатынында, деп хабарлайды turkystan.kz health.mail.ru-ға сілтеме жасап.
Кардиологтардың айтуынша, жүрекке шын мәнінде пайда әкелетін сусын – тек жаңа сығылып, бірден ішілген апельсин шырыны. Қаптамадағы өнім, тіпті «100% шырын» деп жазылса да, басқа санатқа жатады.
Жаңа сығылған апельсин шырынының жүрекке әсері оның биохимиялық құрамымен байланысты. Алдымен флавоноидтар. Апельсинде гесперидин мен кверцетин көп. Бұл заттар қан тамырларының ішкі қабатының жұмысын жақсартып, олардың серпімділігін арттырады. Тамырлар кеңейіп, қан қысымы біртіндеп төмендейді. Атеросклерозға жол ашатын қабыну процестері де бәсеңдейді. Басқаша айтқанда, жүрекке «жеңілірек» жұмыс істеуге мүмкіндік туады.
Екінші маңызды компонент – калий. Ол натрийдің әсерін әлсіретіп, ағзадағы артық тұздың шығарылуына көмектеседі. Бұл қан көлемін азайтып, қысымды тұрақтандырады. Калийге бай тағамдар мен сусындар жүрек-қан тамыр жүйесіне дәл осы себепті пайдалы деп саналады.
Үшінші фактор – витамин C. Ол иммунитеттен бөлек, холестеринмен күресте де рөл атқарады. Витамин C «жаман» холестериннің тотығуын баяулатады. Ал тотығуға ұшыраған холестерин тамыр қабырғасына оңай жабысып, бляшкалардың түзілуіне себеп болады. Осы тұрғыдан алғанда, жаңа сығылған шырын атеросклероздың алдын алатын қарапайым құралдардың бірі.
Тағы бір маңызды жайт – тромб түзілу қаупі. Жаңа шырындағы кейбір биологиялық белсенді заттар тромбоциттердің шамадан тыс бірігуін тежейді. Бұл инфаркт пен инсульт қаупін азайтатын қосымша фактор.
Ал енді қаптамадағы шырынға келсек, айырмашылық осы тұстан басталады. Пастерлеу мен ұзақ сақтау кезінде витамин C мен флавоноидтардың едәуір бөлігі жойылады. Қалғаны – қантқа бай, бірақ жасұнықсыз сусын. Қанттың негізгі түрі – фруктоза, ал ол қандағы қанттың тез көтерілуіне, ұйқыбезге салмақ түсуіне және ұзақ мерзімде метаболикалық бұзылыстарға әкелуі мүмкін. Жүрек үшін бұл – пайдадан гөрі тәуекел.
Сондықтан кардиологтар шырынды «ем» немесе «міндетті» сусын ретінде емес, қосымша ретінде қарастыруға кеңес береді. Күніне 150–200 мл жаңа сығылған апельсин шырыны жеткілікті. Бұл – тамырларға арналған шағын қолдау ғана.
Ал жүрек үшін ең дұрыс таңдау бұрынғыша өзгермейді – тұтас апельсин, жемістің өзі. Онда сол дәрумендер бар, бірақ жасұнық сақталған, қант біртіндеп сіңеді, ал ішек микрофлорасы қосымша пайда көреді.
