Қарағанды облысында «Жаппай кітап оқитын ұлт» тұжырымдамасы аясында жаңа жоба қолға алынды

Бүгін — Ұлттық кітап күні. Бұл күн арқылы елімізде кітап оқудың пайдасы мен мәдениеті насихатталады. Президент Қасым-Жомарт Тоқаев Ұлттық құрылтайда сөйлеген сөзінде прогрессивті  ұлтқа айналу үшін кітапты бала кезден бастап оқуға дағдылану қажеттігін атап өткен еді.

Осы орайда Қарағанды облысында «Жаппай кітап оқитын ұлт» тұжырымдамасы аясында жаңа жоба қолға алынды. Бұл туралы Қарағанды облысының әкімі Ермағанбет Бөлекпаев мәлімдеді.

Бұл әртүрлі жастағы жеткіншектерге арналған іс-шаралар сериясы. Олардың қатарында:

— оқушыларға арналған оқу байқаулары,

— студенттерге арналған пікірталастар,

— мұғалімдерге арналған интеллектуалды квиздар,

— ұрпақтар сабақтастығына арналған отбасылық форматтар бар.

«Бұл жоба балаларымыздың сыни ойлауын, ой-өрісін және зияткерлік әлеуетін дамытуға үлес қосатынына сенімдімін. Осы орайда ата-аналардың, мұғалімдердің және бүкіл халықтың қолдауы ерекше маңызды. Оқу әдетін қалыптастыру тек мектептердің ғана емес, барлығымыздың міндетіміз. Кітап-саналы ойлаудың негізі. Бұл бір реттік науқан емес, тұрақты салтымыздың бастауы болады деген сенім мол», – деп жазды әкім.