Шерхан Мұртаза атындағы Тараз халықаралық институтында «Қарахан мемлекеті тұсындағы Ислам» атты халықаралық ғылыми-танымдық конференция өтті. Облыс әкімдігінің дін істері басқармасы мен Қазақстан мұсылмандары діни басқармасы бірлесе өткізген конференцияның мақсаты – Орта Азия даласына Ислам дінінің келуі, қазақ халқының діни ұстанымы мен Қарахан мемлекеті тұсындағы қазақ жерінен шыққан белгілі тұлғалар және олардың еңбектерін насихаттау.
Облыс әкімінің орынбасары Еркін Үйсімбаев ашқан жиынға Қазақстан мұсылмандары діни басқармасының төрағасы, Бас мүфти Наурызбай қажы Тағанұлы қатысты. Сондай-ақ, конференцияға баяндама жасауға тарих ғылымдарының докторы, профессор Женгиз Томар (Түркия), тарих ғылымдарының докторы Бабаяров Гайбулла (Өзбекстан), PhD доктор Себетов Жаркынбай (Қырғызстан), қазақстандық ғалымдар – Нұр-Мүбарак университеті Әбу Ханифа ғылыми-зерттеу орталығының директоры, профессор Шамшәдин Керім, тарих ғылымдарының докторы, профессор Әшірбек Мүминов, филология ғылымының кандидаты, доцент Төреәлі Қыдыр және т.б ғалымдар шақырылды.
Ғалымдар Қарахан дәуіріндегі діннің дамуы, жазба ескерткіштер, Ислам әдебиеті, әдеби жәдігерлер, Тараз қаласының Ислам тарихындағы орны секілді тақырыптар бойынша баяндама жасап, тың тарихи мәліметтермен бөлісті.
Келесі кезекте Қазақстан мұсылмандары діни басқармасының төрағасы, Бас мүфти Наурызбай қажы Тағанұлы облыстық «Һибаттула Тарази» орталық мешіті жанынан бой көтерген «Қамқор-Шарапат» салттық қызмет орталығының және Айша бибі ауылындағы «Һибаттула Тарази» медресе-колледжі ғимаратының ашылуына қатысып, облыстағы спорт майталмандарымен кездесті.
Шарада ҚМДБ-ның Жамбыл облысы бойынша бас имамы Бейбіт Мырзагелдиев, Жамбыл облысы әкімдігінің Дін істері басқармасының басшысы Сәкен Сәрсенбайұлы болды.
«Зиялы қауым ұлттың қайрағы болса, спорт майталмандары – ұлттың қайраты. Себебі спорт – қазақтың рухы. Сіздер әлемдік бәсекелерде жеңіске жетсеңіздер, бүкіл халық қуанады, қайраттанады, рухы көтеріледі. Демек сіздер спортта түрен салу арқылы тұтас елдің намысын қорғайсыздар. «Ерді намыс өлтіреді» дейді бабаларымыз. Біздің қазақ намысты бәрінен биік қойған. Намысы бар адам Отанын сүйеді. Отанын сүйген адам ұлтының құндылықтарын қастерлейді. Тілін, дінін, дәстүрін, мәдениетін құрметтейді» — деді Наурызбай қажы Тағанұлы.
«Қазақстан Барысының» үш дүркін чемпионы Бейбіт Ыстыбаев бастаған спортшылар Бас мүфтиге өз сауалдарын қойып, дәйекті-дәлді жауаптарын алды.
Дедек Төлен
