«Қаралма» биыл жыл соңында пайдалануға беріледі
Аудан аумағындағы «Қаралма» тау-шаңғы базасында біраз уақыттан бері саябырсып қалған құрылыс жұмыстары қайта қарқын алып келеді.
Жекеменшік инвестор Мейірбек Жүнісовтің айтуынша, бүгінгі күнге дейін туристік объектіге 4,0 млрд теңгеден астам жеке қаражат, екінші деңгейлі банктердің несие ресурстары мен өзге де қаржы жұмсалған. Қазір мұнда негізгі құрылыс жұмыстарының 90 проценті атқарылған.
«Батыс Еуропа-Батыс Қытай» халықаралық көлік дәлізінен тау-шаңғы базасына дейін 8 шақырымға жуық автомобиль жолы салынып, электр желісі мен жарықтандыру бағандары орнатылған, газ құбыры жеткізілген. Туристерге арналған мейрамхана, сервистік орталық, бес машинаға шақталған гараж, үлкен және кіші арқанжолдар, сырғанау жолақтарының құрылысы аяқталып, кварталішілік газ құбыры мен жарықтандыру желісі тартылған.
— Өткен жылы «Бизнестің жол картасы-2025» мемлекеттік бағдарламасы аясында 488,0 млн теңгенің несие қаражатына қол жеткізіліп, ауызсу, кәріз жүйелері, су жинақтау орны, сүзгілеу-тазарту алаңшалары салынып, қолданысқа берілді.
Соңғы екі жылда тау бөктерінде қардың тиісті мөлшерден аз түсуі ескеріліп, құрылыс жұмыстарында аздап кідіріс болғаны рас. Сондықтан мамандармен кеңесе келе, мұнда судан жасанды қар жасау қондырғысын орнату қажет деп шештік. Оған қоса қар ататын зеңбіректер, ратрак алу қажет. Құрылысты толық аяқтау үшін қосымша тағы да 1,0 млрд теңге қаражат қажет. Оны жекеменшік инвесторлар мен екінші деңгейлі банктердің несие ресурстары есебінен табу қарастырылып отыр.
Жасанды қар жасау қондырғысына жергілікті су көздерімен қатар, пайдаланылған шайынды суларды қайта өңдеп, кәдеге асыруды да көздеп отырмыз, — дейді жоба бойынша серіктес «Таразстрой-2004» ЖШС-ның директоры Қуат Баққараев.
Серіктестік директорының ратрак деп отырғаны трактор конструкциясы негізінде жасалған шынжыр табанды, қардың үстінде өздігінен жүретін алып техника екен. Оның көмегімен шаңғы трассалары мен таудың қарлы бөктерлерін дайындау, атқыланған қар жерге біркелкі түспейтін болғандықтан, оны тегістеу, таптау, адамдарды тасымалдау мен құтқару операциялары жүргізіледі.
Осымен қат-қабат қонақтарға арнап тұрғызылған коттедждердің де ішкі-сыртқы әрлеуі аяқталмақ.
Инвесторлардың айтуына қарағанда, объектідегі құрылыс жұмыстары 2022 жылдың соңына дейін толығымен аяқталып, пайдалануға берілмек. Бұйырса, осы жылдың аяғында туристік кешен алғашқы демалушылар легін қабылдайтын болады.
https://www.facebook.com/100023181128494/posts/1071395786976449/
