Өңірлік коммуникациялар қызметінің алаңында Талас ауданының әкімі Д. Алиевтің қатысуымен брифинг өтуде. Жиын барысында аудан әкімі құрылыс жұмыстарының жайын баяндап өтті.
– Үстіміздегі жылдың 4 айында Талас ауданындағы құрылыс жұмыстарының көлемі 768 млн. 400 мың теңгені құрап, өткен жылымен салыстырғанда 177 пайызға артық орындалды.Аудан бойынша пайдалануға берілген тұрғын үйлердің жалпы көлемі 2 980 шаршы метрді құрады.
Бұдан бөлек, «Тұрғын үй-коммуналдық шаруашылығын жаңғыртудың 2011-2020 жылдарға арналған» бағдарламасы аясында Қаратау қаласында 3 көпқабатты тұрғын үйлерге жөндеу жұмыстары жүргізілуде.
Ал, «Қол жетімді баспана – 2020» бағдарламасы бойынша ауданда 2019 жылдың 1 мамырына кезекте тұрған тұрғын үйге мұқтаж азаматтар саны 1 599 адамды құрап отыр.
Бағдарлама аясында Қаратау қаласында жалпы ауданы 27 752 шаршы метрді құрайтын 440 пәтерлі 6 көпқабатты тұрғын үй жөндеуден өткізіліп, кезекте тұрған азаматтарға кезек ретімен берілуде.
Сонымен қатар, қаладағы бос тұрған 3 көпқабатты тұрғын үйлер коммуналдық меншікке алынып, аудандық бюджеттен 14 млн. 910 мың теңге бөлініп, үйлерді қайта жаңғырту және инфрақұрылымын қайта құруға жобалық-сметалық құжаттар әзірленуде, – деді аудан басшысы өз баяндамасында.
Сонымен қатар, ауданда көп балалы немесе жағдайы төмен отбасыларды уақытша тұрғын үймен қамтамасыз ету жұмыстары жа жүргізілуде. Бұл мақсатта, Қаратау қаласындағы 3 мөлтек ауданы №3 және №4 жатақханалары Талас аудандық сотының шешімімен коммуналдық меншікке алынып, қайта жаңғырту жұмыстарына 452 млн. теңгеге жобалық сметалық құжаттама жасалған. Сонымен қатар, демеушілер есебінен 3 көп балалы отбасыға Бостандық, Ойық және Үшарал ауылдарында 3 үй сатып алынды.
